Jerusalem-a al-Aqsa Mosque hung chunga Israeli police nena an intihbuainaah Palestinian 150 chuangin hliam an tuar niin Palestinian damdawi in thuneitute chuan an sawi.
Israeli police chuan officer-ten a hmun an thlen hian halpuah, lung leh thil dang hmangin an lo bei nghal niin an sawi.
Israeli police pathumin hliam an tuar ve bawk niin an sawi.
He hmun hi Muslim leh Judate tana pawimawh leh hlu tak a ni ve ve a, Temple Mount tia sawi niin hman ata tawh anmahni hmun ve vea an chhal a ni.
Israeli-Palestinian inkar hi tun hnaia Israel-a beihna rapthlak tak a thlen hnu leh Israel-in a titute um zuia West Bank-a Palestinian an luhchilhnaa thihna a thlen fo avangin a tang thar hle.
Palestinian health ministry chuan Ningania West Bank hmar lama, Jenin-a Israeli-ten beihpui an thlaknaa hliam tuar, Palestinian rawlthar kum 17 mi chu Zirtawpni khan a thi niin an sawi.
Kar kal ta Ningania Tel Aviv-a Palestinian pakhatin Israeli pathum a thah hnua Israel-in West Bank, a bikin Jenin district vela beihpui a thlaknaah Palestinian 20 vel an thi tawh a, a tam zawk hi silai nena inthuamte an ni.
Kar hmasa Ningania Israel-a beihna thleng hi chawlhkar hnih chuang chhunga Israeli Arab leh Palestinian ten beihna an thlen vawi lina a ni a. Israeli 12 leh Ukrainian pahnih an thi a, kum 15 chuang chhunga an rama hetiang beihna avanga thihna a thlen tam ber tum a ni.