United States-a South Carolina state khawpui, Columbia-a bazarpui (shopping centre) lûn taka inpawngkahna thlengah mi 14 velin hliam an tuar a, a titu nia hriat mi pakhat man a nih tawh thu police chuan an sawi.
An ram huna Inrinni (India-a Pathianni chawhma)-a Columbiana Centre-a silai puaka hliam tuarte hi kum 15 leh 73 inkar an nih thu Columbia Police Chief W H ‘Skip’ Holbrook chuan a sawi a. Thil thleng an bawhzuinaa mi pathum an hren zinga mi, kum 22 mi, Jewayne M Price chu an la kawl thu leh dan lova pistol a ken avangin thubuai siamsak an tum tih a sawi.
Holbrook chuan thi an awm loh thu leh mi pakua chu kah fuh an ni a, mi panga erawh mall a\anga tlanchhiat an tumna lama inhliam an nih thu a sawi.
Police chuan a upa ber, kum 73 mi chu damdawi ina enkawl zui a nih thu leh mi dangte chu chhuah leh nghal an nih thu a sawi bawk.
Chhuitute chuan mi pathum velin mall chhungah hian puak thei an lek nia an hriat thu an sawi a, mi engzatin nge hmet puak tih an chhui zui mek a. Police chuan silai pakhat chiah an la man thung.
Inkahna a thlen hnuah hian police tam takin a hmun hi an thutchilh nghal a, mall pawh kartawp mi tam lai mah ni se hun eng emaw chen an khar.
Officer-te hian a bul hnaia khualbuk chu inkahna thleng avanga tlan darh chhungkuate inhmuh khawm leh theihna hmun atan an buatsaih nghal bawk.