Russia-in Ukraine a rûn avanga European Union (EU)-in a hrekna thar avangin Russian leh Belarussian truck driver-te chuan EU chhuahsan tumin Poland-Belarus ramri-ah thui tak an intlar.
Inrinni zanlai hnu lam atanga hrekna kalpui turah hian truck-te hi ramri-ah hian km 80 vel zet intlarin thenkhat chu darkar 33 zette an tang.
EU hian damdawi, mail leh petroleum product phur tih loh Russia leh Belarus lorry-te chu an rama luh emaw, an awm emaw a phal lo va, hei hi Russia-in Ukraine a rûn avanga a hrek belhna a ni.
Drone atanga thlalak Reuters news agency-in a tar lanah chuan zanlai, hun tiam a thlen dawn tep thlengin thui takin an la intlar.
“Kilometre eng emaw zat inkhalh tur a la awm a, kan thleng hman ang emaw?” tiin Belarusian driver pakhat chuan hun tiam chhunga ramri kân hman loh a hlauhawm thu a sawi.
Hun tiam a ral hnuah hian ngaihhnathiamna hun darkar 12 chhung siam leh niin BBC chuan a tar lang a. Ramri kânna hmun hnihah truck 230-400 vel an la awm niin a tar lang.
Ramri kân hman lo tur chiang sa, EU ram hrang hrangah ram pahnih truck sang chuang an awm ngei tura ngaih a ni bawk a. Hengte hi engtin nge tih an nih dawn hriat a la ni lo.
An hmabak awmchhun nia lang chu an awmna ram thuneituten an lo man mai a nih hmel.
Transport lama Polish thuneitu pakhat chuan tuna EU-in hrekna a kalpui hi Polish truck tam tak, Russia leh Belarus-a awm leh haw mekte tan a buaithlak ve tho tih an sawi.
Tar lan fo tawh angin EU leh khawthlang ram tam takte chuan Russia leh a thawhpui, Belarus hi Moscow-in Ukraine a rûn avangin a hrek a ni.