Aizawl: BJP Mizoram Pradesh President Vanlalhmuaka chuan BJP lo chu Mizoram mipui rinngam tur an awm loh avangin BJP lo chu sorkar tur an awm loh thu a sawi.
Upper Republic-ah nimina chhung inkhawm neihah Vanlalhmuaka hian thu sawiin, “Mizoram ah hian BJP lo chu sorkar tur an awm lo a, Mizoram mipui rin ngam tur keini lo chu an awm lo a ni tih hi a chiang a ni. BJP thupui ‘mi tinin an chanvo an chang vek tur a ni’ tih hi kan thupui a ni reng,” a ti.
Mizoram tana an hnathawh tur chungchang sawiin BJP Mizoram State President hian êng (power) nei lote tana êng pek, tui nei lo tan tui pek, in nei lote hnena in pek, lo neitute tana hamthatna siamsaka kuthnathawktute tana pension scheme PM scheme kaltlanga siamsak, Mizoram khaw tin inkalpawhna kawng siam that a, mi retheiten awlsam zawka an chhawr theihna tur nan te, mipui mamawh, a te ber thlenga pek hi BJP thil tum leh hnathawh tur ber a nih vangin Mizoramah pawh hei tho hi an hna thawh tur a nih thu a sawi.
BJP Mizoram Pradesh president hian state dangte hmasawnna hi awt ringawt tur a nih loh thu sawiin, “Mizoram pawh hian State dangte hmasawnna neih ang hi kan nei thei a, India hmarchhakah pawh BJP sorkarna a ding vek tawh a, BJP sorkartirtute chu tun hmaa party danga awm thinte an nih avangin tun hunah pawh hian Mizoramah hian BJP sorkar hi kan mamawh chu a ni,” a ti.
BJP ni lo party danga awmten Mizoram hmasawn an duh vangin development hna thawk thei tur tak tak chu BJP an nih avangin political party dangten BJP an la zawm vek a rin thu a sawi bawk.
Nimin vek khan BJP din champha pualin BJP party member thenkhatten hmunhlui tlawha tifaiin hun an hman hmang bawk a ni.