Sweden-ah pawl pakhatin Quran hal an tum avanga mipui thinrim inhawr khawm leh police intihbuaina avangin mi 40 chuang man an ni.
Pathiannia Norrkoping-a buaina chhuakah hian mi pathumin hliam an tuar a, officer-te hian mipui hnawh darh nan silai an hmet puak tih police chuan an sawi.
Tharum thawhna hi Danish-Swedish politician Rasmus Paludan-a’n vawi tam kawng zawh leh vantlang inkhawm a huaihawt atanga intan a ni.
Islam sakhaw lehkhabu thianghlim a hal thu leh a dang pawh la hal a tum thu a sawi a ni.
Muslim-te chuan Quran hi Pathian thu thianghlimah ngaiin tichhia emaw, zah lo taka ti emaw chu a laka na taka hremna lek turah an ngai.
Saudi Arabia chuan demna thu chhuah nghalin, “Sweden-ah mi thenkhatin lehkhabu thianghlim, Quran chu zah lo taka tiin Muslim-te rilru an tina hle a ni,” an ti.
A hmain Iran leh Iraq sorkar pawhin an rama Swedish palai ve vete chu hetiang thil a thlen chungchang hi sawi fiah turin an lo hriattir tawh.
Swedena national police chief, Anders Thornberg chuan Pathianni zana Norrkoping khawpuia tharum thawhna thleng ang chu a la hmuh ngai loh thu a sawi a. He khawpui hi Stockholm chhimthlang lam km 160 chuanga hla niin Linkoping bul mai a ni.
Zirtawpni khan Stockholm dai, Rinkeby leh khawthlang lam, Orebro-ah te buaina a lo chhuak tawh a. Inrinni khan chhim lama Malmo-ah pawh an buai tawh.
Thawhtanni khan police officer 26 leh civil mi 14-in hliam an tawrh thu leh lirthei 20 vel tihchhiat a nih thu police chuan an sawi.
Tharum thawhnaah hian mi 200 vel an inrawlh a, mi sual pawl inzawm nghet takte tih a nih an rin thu an sawi a. Mi thenkhat chu police leh security service, Sapo-in an hriat chian tawh an nih thu an sawi bawk.
Pathiannia Norrkoping-a buaina chhuak hi Paludan-a’n he khawpuiah hian vantlang inkhawm a huaihawt dawn tih a sawi hnu lawkah a ni a. Amah tak erawh a inlan lo thung.
A kaihhruai, an rama pem lut duh lotu, Stram Kurs (Hard Line) party chuan thuchhuah siamin Paludan-a hian thuneitute atanga amah himna tur khawp vengtu an pek theih dawn loh avangin a tum a thulh tih an tar lang.