Zokhawthar LCS kaltlanga sumdawn theih nan PM hnenah memorundum thehlut

Zokhawthar Land Customs Station (LCS) kaltlanga Myanmar nena dan anga insumdawn tawnna kalpui a nih theih nan a rang thei ang bera hma la turin International Trade Initiative Forum (ITIF) chuan Prime Minister Narendra Modi hnenah memorandum a theh lut.
ITIF hian India sorkarin khawchhak lam ram, a bikin ASEAN ramte nena insumdawn tawnna a ngai pawimawh hle tih an sawi a. Kum 2014 atanga Act East Policy tihhlawhtlinna atana pawimawh ve pakhat chu Myanmar nena ramria insumdawn tawnna a nih laiin, kum ruk lai a liam hnu pawhin, a bikin Zokhawthar atang chuan dan anga bungraw lak luh a awm lo tih theih tluk a nih thu leh, Zokhawthar LCS-ah hian dan anga la lut tura thil mamawh a la tam avangin dan angin sumdawngten bungraw lak luh leh thawn chhuah chungchangah harsatna an tawk nasa hle niin an sawi.
Barter atanga formal trade-a luh hnu kum ruk lai a liam hnuah pawh Zokhawthar LCS kaltlanga Myanmar nena dan anga insumdawn tawnna kalpui a la ni thei lo chu pawi an tih thu sawiin, Mizoram leh India tan hlohna nasa takah an ngaih thu an sawi a. “A rang thei ang bera Zokhawthar LCS kaltlanga bungrua lak luh leh thawn chhuah a nih theih nan sorkar laipui hian Zokhawthar LCS hi integrated check post-ah hlang kai thuai se a duh a ni,” an ti.
Hemi chungchangah ITIF chuan March 29, 2022 khan Prime Minister Modi hnenah memorandum a theh lut a, Zokhawthar LCS-a India leh Myanmar insumdawn tawnna dan anga a la kal theih loh chhante tar langin a rang lama hma la turin a ngen a ni.
Prime minister hnena memorandum theh luh copy hi April 6, 2022 khan Mizoram Chief Minister Zoramthanga hnenah pawh thehluh a ni a. Sorkar laipuiah heng harsatna la awmte hi thlensak tur leh bawhzuisak turin ITIF hian a ngen.
April 13, 2022 khan ITIF hian Mizoram Larsap Hari Babu Kambhampati chu a chenna, Raj Bhavan-ah prime minister hnena memorandum thehluh copy hi pe bawkin, ramria insumdawn tawnna kawnga harsatna awm mekte an sawipui nghal a. Larsap chuan lo bengkhawnin he lam thila sumdawngte ko khawma famkim zawka an harsatnate lo sawipui tur leh Mizoram harsatna thawh mek chu sorkar laipuia thlena bawhzui a inhuam thu ITIF hruaitute a lo hrilh a ni.

Memorandum-a thu thlen tlangpui

  1. Zokhawthar LCS hi a rang thei ang bera lntegrated Check Post (lCP) a hlan kai
  2. Zokhawtharah Plant quarantine, Animal quarantine, Food Testing Laboratory leh Immigration office dah
  3. International insumdawnna instrument hman lar ber, Letter of Credit ti thei tura Zokhawthar leh Tiau Khawmawia Bank-te thuam that
  4. Mizoramah Certificate of Origin (COO) pe thei tur pawl phalsak
  5. lnternet connectivitiy rintlak Zokhawthara dah
  6. Border trade tihhmasawn nana damdawi in, education etc. tha din
  7. Zokhawthar LCS-ah weight bridge dah
  8. Visa on Arrival tih theih nan Zokhawthar leh Tiau Khawmawi (Myanmar)-ah ruahmanna siam
  9. lndian Consul Office hi Aizawlah hawn ni ve rawh se

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427