Hriselna lama thuneitute chuan Europe ram pali leh United States-ah naupangte zinga hepatitis vei hmuh an tam thu sawiin a chhan an chhui mek tih an sawi.
Thin vung tia sawi thin bawk, hepatitis hi Denmark, Ireland, Netherlands, Spain leh US-ah a vei hmuh an ni tih an sawi.
Kar hmasa khan UK-a thuneitute pawhin naupangte zingah a nih dan thin pangngai aia tam vei an hmuh thu an sawi tawh bawk.
An kai mai theih dan hi hriat a la ni lo.
European Centre for Disease Control (ECDC) chuan Europe ram palia naupang vei awm zat hi a la sawi chiang lo.
World Health Organization (WHO) erawh chuan Ireland-ah panga aia tam lo leh Spain-ah pathum niin a sawi a. A vei dang pawh hmuh chhuah belh a nih a rinawm thu a sawi bawk.
Europe-ah hian a vei hmuhna ram tinah hian a chhan chhui mek a ni tih ECDC chuan a sawi.
US-a Alabama-a public health department chuan naupang pakua vei hmuh an nih thu leh kum khat leh ruk inkar an ni tih an sawi a, pahnih chuan thin thlak an ngai niin an sawi bawk.
State dangah pawh hetiang hi awmin a chhui hna an thawk zui nghal mek tih an sawi.
A vei tamna ber, UK-ah mi 74 an awm tawh.
Kar hmasa khan UK Health Security Agency chuan virus pangngai, hepatitis (hepatitis A a\anga E) inkai theih ang vei UK-ah hmuh an nih loh thu a lo sawi tawh.
Hetiang a nih avang hian chhuitute chuan a chhan ni thei dang an dap mek a, tlang lawn tak, adenovirus ni theiah an ngai.
Adenovirus hi virus chhungkaw zinga lar tak, damlohna nep deuh – khawsik, luak leh kawthalo thlen thei a ni.
Heng bakah hian hetiang natna kai darh thei dang pawh an chhui zui mek zel a, Covid-19 vang a ni thei em tih pawh an en tel a. Covid-19 vaccine nena inkungkaihna erawh a awm lo niin an sawi.
Hepatitis hi thin vung a ni ber a, damdawi bawlhhlo lam chi ei leh in nasat te, zu in tam lutuk te, damdawi tih nasat leh chi atanga kai theih a ni tlangpui a. A, B, C, D leh E awmin a lan chhuah dan erawh a inang vek lem lo a ni.