Lai District Youth Congress Committee (Lai DYCC) Lawngtlaiin Chief Minister Zoramthanga’n tun thla ni 18 khan Lawngtlai Areopagy-a an party programme-ah Mizoram Police te guard of honour (Salami Sastra) a inpektir nia sawiin, hei hi Mizoram Police-te zahawmna tihbawrhbannaa an ngaih thu an sawi.
Lai DYCC chuan chief minister chuan an party office building thar hawngin Lawngtlai a tlawh tih an sawi a, hemi tuma Lawngtlai Areopagy-a MNF party huaihawt vantlang inkhawmah Mizoram Police-te guard of honour a inpektir niin an sawi.
“Mizoram UT a nih atanga tun thlengin state official programme ni lo, party programme-a khawpui chhung kawngpui dangchat veka Mizoram Police-te guard of honour (Salami Sastra) inpektir hmasa ber a ni,” an ti.
Lawngtlaia chief minister thil tih dan chu thuneihna hman sualna a nih thu Lai DYCC chuan an sawi a. Democracy ramah mipui thlan lalte chu zahawmin lal em em mah se, thuneihna hmang suala state police-te zahawmna tihbawrhban chu pawi an tih thu an sawi bawk.