Buhfai a tam; thuneitute hmalakna a fakawm
Mamit district khawthlang lama supply godown leh a kaihhnawih building a hawnnaah supply minister chuan furpui atan buhfai chhekkhawl 80% zawh tawh a nih thu a sawi a, a thlamuanthlak hle.
Kan hriat angin covid hri lengin min nuai a, chutah ramri buai avangin harsatna kan tawk leh thin bawk. Hetiang a nih lai pawh hian supply minister hian mipuite mangang leh thlaphanga kan awm loh nan theihtawp a chhuah tih a chiang a, vawiin thlengin harsatna zakhua kan la tawk lo chu a nih hi.
A kaihhnawih leh a chan a hrechiang a, hma a la nasa bawk a, hetiang hi a ni kan ramin kan mamawh chu. Fak phu hi chu fak hreh lo ila, nawr kal an ngaihna laiah finchhuah thiam bawk ila, chutianga kan che thiam thin a nih phawt chuan kan ram hi a tluchhe ngai lo ang.
Rengdil leh Tuidam khuaa supply department godown leh a kaihhnawih building a hawnna inkhawmah hian thu sawiin, supply department-in Mizoram mipuiten ei leh ina harsatna an tawh loh nan nasa takin hna an thawk tih minister hian a sawi a. Buhfai pawh monsoon stock tih thin a nih thu sawiin, monsoon stock hi zaa 80 tunah hian zawh tawh a nih thu a sawi bawk a, a thlamuanthlak hle bawk.
Furpui kan thleng chho leh mai dawn a, ei leh ina kan buai lohna tura buhfai chhekkhawl a tam hrim hrim pawh hi thlamuanthlak tak a ni a, hmalatute hmalakna hi a fakawm a, mipui lam pawhin kan theihna zawna lo tawiawm zel hi kan bat a ni tih i hre thar bawk ang u.