Lirthei a tam zel, enfiah leh fir zawka endik a ngai ta
Aizawl khawpui chhungah lirthei a tam tawh hle mai a, kawngpui zauh ngaihna a la awm rih si lo. Zirna leh pisa zawng zawng kan inhawng chho leh tan tawh bawk nen, traffic jam pawh a tam leh tawh hle a ni.
Lirtheite hi dan dik taka tlan an nih chuan sawi buai a ngai lo a, mah se document en dik leh hlui tawh lutuk tlan tir loh dan hi ngaihtuah a ngai reng dawnin a lang. Hmalak thuai thuai pawh a hun awm e.
Lirthei registration nung tawh lo hi nikum December 31 thleng khan 8,709 a awm thu Transport Director Lalrammawia chuan Aizawl City Bus Owners’ Association-in General Assembly vawi 48-na an hmannaah a sawi a, heng lirthei neitute hi demand notice an pek mek thu sawiin, hun tiam chhunga an lirthei registration an tihnun loha an chhiah bate an pek loh chuan black list-ah dah a ni leh dawn tih a sawi bawk.
Hetianga kan ti tak tak ngam lo a nihchuan lirthei hian kiam lam a pan hlei thei dawn lo a, document felfai endik kawngah tan lak thar a ngai viauin a rinawm bawk. Dan dik lo na na na chu hman loh mai nise, sorkar pawh hian vilin, endik tha mawlh teh se. Chuti a nih loh chuan lirthei pung zel hian harsatna min siam zel dawn a, kan harsatnate hi chinfel thuai thuai zel a nih loh chuan buaina min thlentu a ni chho zel dawn bawk a ni.
Lirthei nei duh, chhiah pe tha duh si lo an tam thu director hian sawi bawkin, “Kristian ram tih atan pawh a mawi lo a, mipui chhiah bat hreh lo an tam a, tan kan lak a ngai khawp mai,” a tite hi inenfiah nan hmang mawlh teh ang u.