Mizoram chu India state zinga cancer vei tam berna a nih avangin damlo enkawlna din thuai chu a tul hleah Chief Minister Zoramthanga’n a ngai a, JICA loan hmanga Zemabawka Super Specialty Cancer & Research Centre din tur chu sa thuai turin thawktute a chah.
Super Specialty Cancer & Research Centre din tur chungchanga ngaihtuah tur pawimawhte chu nimin khan CM Cabinet Meeting room-ah sawiho a ni a, thutkhawm hi chief minister-in a kaihruai a, sorkar hotu dang leh JICA hotute an tel.
Zorama chuan cancer vei tam ber nihna Mizoramin a chan mek chu thlak danglam thuai a ngai tih sawiin, cancer laka fihlim theih nana inzirtirna leh thil dang danga hmalak chu a tul rualin damlo enkawlna tha, mahni kawtkaia pan mai tur din thuai chu a pawimawh hmasa a nih thu a sawi.
Super Specialty hospital chu Mizoram mamawh hmasak berte zinga mi a nih tawh avangin a tul angte bawhzui zel tur leh a sak hna tan thuai turin hemi buaipuitu thutkhawma telte chu a chah.
Thutkhawma tel, Health Minister Dr R Lalthangliana chuan Mizoram mipui mamawh em em, hun eng emaw chen ruahmanna lo awm tawh chu a hlawhtling chho dawn tih sawiin, a sak hna tan thuai tura bawhzui ngaite bawhzui a nih tur thu a sawi.
He thutkhawmah hian JICA mi thiamten ruahmanna siam tawhte siam danglam theih lai ni awma an hriatte chu an en ho a ni.
JICA sum bultuma Super Specialty Cancer & Research Centre dinna tur hian sorkar laipuia ministry hrang hrang tun dinhmunah hian a paltlang tawh a ni.