Aizawl: March 29-a revenue minister-in a hawn tawh, huan, lo leh ram kaihhnawih lehkha pawimawite IT hmanga dah thatna leh chhinchhiahna, Computerization of Registration chu a nihna tur ang takin kalpui theih a la ni lo.
Lungleia MJA member-ten nimina an kawmnaah Revenue Department Lungleia Settlement Officer Allan Lalthanzara chuan computerization of registration kalpui tur hian khawl mamawh ang chu an neih vek thu sawiin, hetihlai hian thawktute lo inzir lawkna lamah khawl thenkhatah harsatna neuh neuh chin fel ngai a awm avangin a nih tur ang taka an la kalpui theih loh thu a sawi.
Computerization of Registration chu a nihna tak angin kalpui theih ni loh mah se Registration chu Computerization-a kalpui a nih tur ang kalhmang thoin, manual-a kalpui rih a nih thu chanchinbu mite a hrilh.
Allan-a chuan in hmun, lo ram hralh leh in leisak chungchangah an office chuan court thubuai tam tak an nei tih sawiin, tawngkama buaina engmah awm lo anga insawi, a hnua buai leh tam tak an awm thu leh ram pass hralh leh lei dan dik tawk lo leh inbumna avanga buaina tawk tam tak an awm thu a sawi.
“Computerization of registration hmanga kalpui a nih chuan heng buaina awm thei hi tihreh a ni dawn,” tiin, computerization-a in-register hi ram inchuh buaina lo awm palhah pawh a neitu dik takah ngaih zel an ni dawn tih a sawi bakah mipuite pawhin he kalphung thar hi ngai pawimawh turin a duh thu a sawi.
He hunah hian MJA Lunglei Dist President Laltlanthanga chuan MJA Lunglei chuan Lunglei khawpuia sorkar department hrang hrangte hmalakna leh an hnathawh dante hre chiang tura len thin nise an tih anga revenue department chu tlawh an nih thu leh an hmalakna leh mipuite hriattur puan zar kawngah Revenue Deptt Lunglei chu MJA-te laka inthlahrung lo turin a sawm a ni.