Vawk thi a tam, vawk vulhtute ngaihtuah an ngai tak zet
African Swine Fever (ASF) vangin vawk tam tak an thi a, a thi ve lote pawh tihhlum an ngaih phah hial. Vawk vulha eizawng tam takin harsatna an tawk a, vawiin thlenga manganga la rum an awm mek laiin, he hri hian kian lam aiin min la nuai mek zel thung niin a lang a, a pawi tak zet a ni.
ASF vangin hmun thenkhatah vawk an la thi reng a, sorkar pawhin ruahmanna siamin vawk leh vawksa atanga thilsiam lakluh danah thuchhuah thar a siam leh bawk. Zawm zel mai hi kan tihtur hmasa chu a la ni phawt mai e.
Hetiang a nih mek lai hian Kolasib lamah pawh vawk thi an awm leh nual mai a, ASF vanga puh ni chiah lo mah se, vawk natna leng fo thin classical swine fever nia hriat a ni thung. A natna lam chu engpawh lo nise, hri leng vang hrim hrim hi vawk tam tak an thi leh, a vulhtuten harsatna an tawk ta mawlh mawlh mai hi a veiawm a, ruahmanna tha zawk nen an dinchhuah leh theih nana ruahmanna siampui a tul hle.
Tun dinhmunah Kolasib khawpui chhunga vawk vulhtu eng emaw zat chuan ni tin deuh thaw vawk an chan a, hetianga an vawk an chan tak hlutzawng hi a tlem thei ang bera chhut pawhin cheng nuai 50 chuang man a ni tawh a ni. A tam tham hle. Sorkar hian ruahmanna tha zawk hi siampui thuai thuai se la, state sorkar atanga tanpuina a awm thei ta ngang lo a nih pawhin central atangin na zawka tanpuina hi lo thleng leh tura nawr a hun tawh hle. Chuti a nih loh chuan vawk vulhtute hi mangangin an awm chho zel palh ang e.