UK Prime Minister Boris Johnson chuan Narendra Modi biain ram venhimna, energy leh sumdawnna lama inkungkaihna an sawi dun.
Johnson-a chuan an inkara palai hna thawktute chu an ramin EU a chhuahsan hnuah zalen taka insumdawn tawnna an kalpui theihna turin October thlaa Diwali hma ngeia inremna a awm theih nan hma la turin a ti.
Prime minister hi an ram lamah erawh ram a kaihhruai danah leh a chenna, No 10-a inkharkhip laia intihhlimna a huaihawt nia sawi a awm chungchangah sawi a hlawh mek bawk.
Ningani khan MP-te chuan Johnson-a hian heng thilah hian an ram rorelna in, parliament chu thu dik lo a hrilh em tih chhui zui tura phalna an pe ta bawk.
Sorkar chuan hemi chungchanga ngaihdan lakna chu tihkhawtlai a tum nasa hle a; mahse, eptute zinga mi, anmahni party thlawp thinte ni bawkten ngaihdan an thlak leh thut avangin vote lak a ni ta a ni.
Johnson-a hi Commons Privileges Committee-in an chhui dawn tihna a ni a, tunah hian dan phal lovin a chennaah punkhawmna a awm em tih hi Metropolitan Police-in an chhui mek a, an zawh hunah an chhui ve ang.
Kar hmasa khan Johnson-a hian Downing Street-a eng emaw tihkhawm siamnaah Covid dan zam a bawhchhiat avangin pawisa a lo chawi tawh a. A hmain MP-te hnenah hian No 10-ah engmah dan bawhchhiat a awm lo tih a sawi tawh bawk a, a hnu lawka pawisa a chawi leh si avangin eptute chuan prime minister hian thu dik tawk lo a sawi niin an puh phah.
A hma atanga prime minister lo sawisel tawh thin, Conservative MP Tobias Ellwood chuan dan bawhchhiatna a lo awm ngei a nih hlauh chuan Johnson-a hian ama MP-te ngei atangin rintawk lohna put luh a tawk dawn niin a sawi.
Defence Committee chair chuan prime minister thawhpuite atanga ngenna a dawn, Ukraine-a indona a la awm chhunzawm reng laia hruaitu chungchanga thil thui tak kalpui chu a hun lo nia sawia tihkhawtlai an ngenna pawh a hnawlsak tawh bawk.
Covid avanga hun rei tak tihkhawtlai a nih hnuah Johnson-a hian India hi ni hnih chamin a tlawh a, a ni hnihnaah Modi-a nen hian an inkawm.
An inkawm hma hian Downing Street chuan UK hian India hnena sipai hmanruate thawn luh dan tur dap a ni dawn tih a puang.
Johnson-a hian India-in indo thlawhna siam a tumah UK-in puih a inhuam thu a lo sawi tawh a, hei hi Russia-a India a innghat lutuk tihnepna tur a ni.
No 10 chuan ram pahnihte hian Indo-Pacific huam chhung, Indian Ocean pawh huamin, heng hmuna venhimna lama thawhho zelna tur pawh sawi dun tur a nih thu a tar lang bawk.
Ram pahnih hruaitute hian UK-India sumdawnna dinhmun leh huang zauh dan turte pawh an sawi dun a.Sumdawnna lama inremna hi Johnson-a chuan favangah chuan ziah fel hman ngei a duh a ni.
Indonaa India dinna chian tum
Johnson-a India zin hian Russia-in Ukraine a rûn mek chungchanga Delhi dinna chu chiang taka hriata sawipui a tum.
Tar lan fo tawh thin angin khawthlang ramte chuan India hi hmina khawi lam mah mah tan zawk nei lova a awm chu thiahsaka Moscow chu dem ve turin an duh hle a, a thlem pawh an thlem nasa a. Russia hi India-in ralthuam a lakluhna ber a ni ve thung.
Tun thla tirah khan India hian Ukraine-a Bucha khuaa civil mi ruang tak tak chhar a ni chu a dem thu a lo sawi ve tawh a, hei hi Russia-in sipai chakna hmanga Kyiv a rûn hnua thuchhuah rorum deuh a neih hmasak ber a ni.
Bucha-a thil thleng dem mah se tharum thawhnaa Russia demna lam erawh a la sawisel miah lo thung a ni.
Johnson-a hian Ningani khan Russia nena inkungkaihna tha tak nei, India dinhmun chu UK nena an inan loh thu a sawi bawk.
India dinhmun hre thiam takin tawng mah se thuthar lakhawmtute hnenah chuan ‘liantham taka an thawhho theih a beisei’ thu a sawi thung.
Modi-a nena an inbiak hma hian Johnson-a chuan India nen hian kawng hrang hrang, sik leh sa inthlak dona leh venhimna lamah pawh thawhhona pawimawh tak tak an nei tih a sawi.
“Khawvel hian mi pakhat rorelna ram atangin tihthaihna tawngin mipui rorelna tihderthawn a ni a, zalen taka sumdawnna a tibuai a, mahni rama rorelna a rap hrual a. UK leh India inkungkaihna pawh tuipui fawn bulh bulh karah a awm mek a ni,” a ti.