Taliban chuan tun laia khawvela smartphone hmanga video inpek kualna app lar tak, TikTok leh online-a mi dang nena khelh chi, PUBG te chuan Afghan thalaite kawng dik locah a hruai nia sawiin a khap.
Hel pawl hian TV channel eng emaw zat, thlarau lam nun tichhe thei ang chite an khap bawk.
A hmain Afghanistan-a roreltute hian rimawi, movie leh television soap opera-te an lo khap tawh bawk.
Taliban hian nikuma Afghanistan-a thuneihna an chan leh tirh khan an hun hmasa aia khirh lo zawka ram an hruai tur thu an sawi a; mahse, vantlang zalenna an rah bet hret hret zel a, a bikin hmeichhiate zalenna a tlem ta hle.
An pawlin ro an rel hmasak hun lai, kum 1996 leh 2001 inkar khan Islamist dan khauh tak kengkawhin vantlangin zalenna an nei tlemin khap a tam hle a, sawisel pawh an hlawh hle.
Taliban thupuangtu, Inamullah Samangani chuan khapna an siam thar leh chu ‘thang lo thar mekte kawng dik lova hruai an nih loh nan’ tih ngei ngei tul a nih thu a sawi.
Khapna puanah hian engtik atangin nge an khap dawn tih leh engtia rei nge ni dawn tih sawi a awm lo.
TikTok leh PUBG an khap hi an pawlin nikum August thlaa thuneihna an chan hnua app an khap hmasak ber turte an ni.
Taliban hian inawmtleina tur thil an khap nasat em avangin tun hnaiah TikTok leh PUBG te hi Afghan thalaite zingah a lar thar hle a ni.
Taliban-ten an ramah app pahnih an khap tih an puan ni, Ningani chiah khan an ram khawpui lian tak takah bomb pali a puak a, pakhat chu Mazar-e-Sharif khawpuia Shia mosque-ah a ni.
Mi 31 vel thiin mi dang 87-in hliam an tuar a. Islamic State firfiak pawl chuan an tihah an chhal.
Ningani khan sorkar news agency Bakhtar News chuan Taliban-ten mosque beihnaa a mawhphurtu ber an man tih an puang bawk.
tiktok, pubg, internet leh Afghan-te
TikTok hi tun hnaiah Afghanistan-ah chuan a lar thar hle a, a bikin mipa thalai zawkten uarin film tawi tete siam nan te, nuihzatthlak lam video clip siam nan leh mahni intar lanna atan pawh an hmang nasa hle.
PUBG tia hriat, PlayerUnknown’s Battlegrounds ve thung hi online-a indo game niin South Korean developer-in a siam niin khawvel pumah a lar a. Taliban-ten ro an rel hma pawh khan mipui thlan sorkar khan khap a tum tawh a; mahse, an hlawhchham thung.
Afghanistan-ah hian tun hnai kum eng emaw ti atang khan internet hmang an pung chak hle a, mi maktaduai kua chuang hmang an awm mek.
Mihring maktaduai 39 cheng zinga hmun thuma thena hmun hnih vel hi kum 25 leh a hnuai lam an ni a, internet hmangtu tam ber an ni bawk.