North Korean hruaitu, Kim Jong Un leh South Korean president chawl mai tawh tur, Moon Jae-in te chuan tun kar khan thian tha angin lehkha an inthawn tawn niin North Korean sorkar chanchinbu chuan a tar lang a. Hetiang hi a thleng khâtin ram pahnih tana thil lawmawm tak ve ve a nih thu a tar lang.
Korean Central News Agency chuan Moon-a hian kar tir lamah khan Kim-a hi lehkha thawnin Korean impumkhat theih nan a chawlh hnuah pawh a thawk zel dawn tih a hrilh a. Kim-a pawhin chhangin Moon-a hnenah hian ram tana a thawhna zawng zawng lawm thu a hrilh let bawk.
Kim-a hian a chhan letna lehkhaah hian an thawh dunna chuan ‘nakin atan beiseina’ a siam tih sawiin, ‘Korean ram hnih inkungkaihna chu a that zel’ a beisei tih a sawi.
South Korea pawhin ram hnih hruaituten lehkha an inthawn tawn tih hi Zirtawpni khan a puang ve bawk.
Hruaitu pahnihten lehkha an inthawn hun hi Korean peninsula-a boruak a tan thar leh mek laiin a ni a. Thlalem atanga thlalakah Pyongyang chuan kum 2018-a a khar tawh, Punggye-ri-a nuclear a enchhinna hmun chu a din thar leh mek niin a lang.
North Korea hian missile a siam thar pawh kar hmasa khan an ram dintu, Kim Il Sung-a pianchamah enchhinin March khan ballistic missile enchhin lo tura tihna bawhchhiain a lo enchhin tawh bawk.