Aizawl: Mizoram Presbyterian Kohhran hnuaia Pastor Bial hrang hrangte chuan nizan atang khan bial inkhawmpui an hmang tan a, vawiinah rorel inkhawm neih a ni ang.
Covid-19 leng avanga tum hnih ngawt Bial Inkhawmpui hi mumal taka hman theih a nih loh hnuah tun tumah erawh dan pangngai angin hman leh theih a ni ta a ni.
Inkhawmpui tan zan, nizan khan palai lawmna leh report inkhawm neih a ni a, vawiinah nilengin rorel inkhawm neih a ni dawn a, Pathianni zanah inkhawmpui hi a tiak ang.
Hri leng tan kum, 2020-ah khan Bial Inkhawmpui hun April thlaa Pathianni chawhlhni hnuhnung ber hmangin khawmpui neih theih a ni lo a, kum tawp dawnah rorel palai tlem tê nen inkhawmpui neih a ni.
Nikumah pawh vantlang Pathian Biak Inkhawm tel loin a hun bi loah pawh inkhawmpui hi neih a ni a. Inrinniah rorel inkhawm bak neih theih a ni lo.
Kuminah erawh hri leng a ziaawm a, inkhuahkhirhnate thlahdul a nih tawh avangin inkhawmpuiah hian zan lam inkhawm pawh neih phal a ni tawh a ni.