Aizawl : Kolasib district SEDP committee chu a vawikhat nan nimin khan an chairman, Kolasib bawrhsap John LT Sanga hovin an thukhawm a. Village level SEDP committee din dan tur an sawiho.
Sorkar thuchhuahin a tarlan danin, Village level SEDP committee-ah hian chairman leh member secretary te ruat tur niin, member atan In 250 aia tlem awmna khuaah prominent citizen 3, In 251-500 chinah prominent citizen 5 leh in 501 leh a aia tamah prominent citizen 7 ruat tur an ni.
Village level SEDP committee hi tun thla chhunga din fel hman tura ruahman a ni a. Kolasib bawrhsap chuan SEDP chu sorkar flagship programme pawimawk tak a nih thu sawiin, district leh village level committee member-te chu field a thawktu an nih angin SEDP hlawhtlinna atana fawng pawimawh tak vuantu an nih thu a sawi a. SEDP hnuaia hna kalpuite chu a hlawhtlin ngei theihna tura hma la turin committee member te chu a chah.