Kashmir chhim lam, Pulwama-a Pahoo-ah Pathianni khan venhim hna thawktuten Lashkar-e-Taiba (LeT) firfiak pawla tel mi pathum an that.
Venhim hna thawktute hian heng lai hmunah hian mi firfiak awm an awm tih thu an dawn chu bawhzuiin an thawk chhuak a, inkahna thlengah an kap hlum niin police hotu pakhatin news agency PTI a hrilh.
Venhim hna thawktuten an zawn mek lai hian anmahni zawk hian an lo kap hmasa a, chhang letin inkah tawnna a thleng a. Inkahna a reh felah mi firfiak pathum hi an thi tih hmuh a ni ta tih a sawi bawk.
A hma ni chiah khan Prime Minister Narendra Modi chuan union territory hi a tlawh a, hei hi kum 2019-a New Delhi-in danpui hmanga a hung bikna, Article 370 a hlih hnua a tlawh hmasak ber a ni.
Modi-a hian leiverh leh hydropower project pahnih a hawng a, a sorkarin hmasawnna a thlen dante a sawi. “Helai hmunah hian kum 2019 atang khan beisei phak bakin hmasawnna a thleng a ni,” a ti.
Inrinni khan Jammu & Kashmir Police chuan Pakistan-a hmunpui nei, Jaish-e-Mohammad (JeM) firfiak pawla mi pahnih chu Kulgam district-a Mirhama-ah an lo that tawh bawk.
Inkahna hmunah hian silai leh ralthuam dang eng emaw zat hmuh a ni bawk.