Tlabung Kawrpuichhuaha Bangladesh ram nena insumdawn tawnna atana Integrated Check Post (ICP) dinna hmun tur chu Inrinni khan Bangladesh Commerce Minister Tipu Munshi-a’n a tlawh a. Mizoram nena insumdawn tawnna tihhlawhtlin chu Bangladesh sorkarin a ngai pawimawh takzet tih a sawi.
April 22, 2022 khan Munshi hi Mizoram lo thlengin a tuk, Inrinni khan Kawrpuichhuaha ICP dinna hmun tur a tlawh nghal a. Bangladesh minister hi Commerce & Industries (C&I) changtu minister, Dr R. Lalthangliana leh sorkar mi pawimawh dangten an lo dawngsawng a ni.
ICP dinna hmun tur Kawrpuichhuah Tlabunga inkhawm tawi neihah Munshi-a’n thu sawiin, “ICP Kawrpuichhuah leh Silsuri, Tuipuibari, Nunsuri leh Marpara-a Border Haat te an nih tur anga tih puitlina kalpui an nih theih nan Bangladesh sorkarin kan tih ve turte a rang thei ang bera umzui kan tum a ni,” a ti.
Munshi hian Mizoram leh Bangladesh chu ramri intawm a nih angin boruak tha hnuaia hmalak tlan zel a tul thu leh, insumdawn tawnna kalpui a nih chuan inlaichinna tha zawk a hrin ngei pawh a rin thu a sawi a. Mizoram thar chhuah balhla, hmarcha leh Mizorama tam em em, lung (boulder)-te Bangladesh chuan a mamawhin a lei duh reng tih a sawi bawk.
Commerce & Industries Minister Dr R Lalthangliana pawhin thu sawiin, ram economy than len zelna turin ram dang nena insumdawn tawnna tihhmasawn a pawimawh a, hemi kawnga hmasawnna turin Bangladesh leh Myanmar ramte nena border trade tihlawhtling turin theihtawp an chhuah zel dawn tih sawiin, “ICP leh Silsuri, Tuipuibari, Nunsuri leh Marpara-a Border Haat te chu a nihna ang tur takin kan chhawr tangkai theih thuai a beiseiawm a ni,” a ti.
Myanmar lam ramri depa border trade pawh Myanmar ram boruak a ziaawm veleh ngawrh taka kalpui tum a nih thu leh tun dinhmunah Zokhawtharah Rs. nuai 1,500 man hu project kalpui a nih thu a sawi a. Border trade tihlawhtling turin ramri hrula cheng mipuite an pawimawh takzet a ni tiin, he hmalakna hi mipuiten ngai pawimawh tur leh sorkar tawiawm turin Commerce & Industries minister hian a sawm a ni.
Munshi hi Md. Abdus Samad Al Azad, Joint Secretary (FTA-1), Ministry of Commerce, Bangladesh; Dr. AKM Atiqul Haque, Minister (Commercial), Joint Secretary, Bangladesh High Commission, New Delhi ten tawiawmin, Dr R Lalthangliana bakah C&I Commissioner Esther Lal Ruatkimi; Tuipui West bialtu MLA Nihar Kanti Chakma, Lunglei South bialtu MLA Dr K Pachhunga, Lunglei DC Kulothungan A, Lunglei SP Rex Zarzoliana Vanchhawng leh district official dangte, Lunglei MJA, Chhimbial Chhantu ten an lo dawngsawng a ni.