MZP hruaitu ten nimin khan School education minister Lalchhandama Ralte hmuin, Myanmar ram buai avânga Mizorama raltlan zinga zirlai awm ten zirna an chhunzawm theihna tura ruahmanna tha zawk siam turin an ngen.
School education minister chuan MZP-in a hnena an thu thlen chungchangah chak taka hmalak mek a nih thu MZP hruaitute chu a lo hrilh a. Zirna document/education certificate felfai tak neite tan chuan admission leh zirna chhunzawm kawngah harsatna engmah a awm loh tur thu a sawi.
Nimin vek khan MZP hruaitute chuan Mizoram board of school education (MBSE) hotute pawh hmuin, HSLC leh HSSLC exam result dik leh felfai zawk a awm theihna tura theihtawp chhuah turin an ngen a. MBSE hotute pawhin result dik leh felfai nei tura theihtawp an chhuah thua lo chhangin, kumdanga harsatna awm thinte pawh a theih ang anga pumpelh tura uluk zawka hma an lak thu an lo hrilh.
MZP hruaitute pawh kumdang zawng aia uluk leh zualin MBSE chuan hma an la nia an hriat thu sawiin, beiseina sang tak nen an thlir mek tih an sawi bawk.