Adele studio album palina tur, ’30’ chu November 19, 2021 hian tlangzarh a ni dawn ta.
Kum nga hnu lama a tih-chhuah tur hian ngaihven a hlawh hle a, hemi kum nga chhung hian a nun leh zinkawngah tawn-hriat harsa leh hrehawm tak tak a paltlang bawk avangin a taksa leh rilru lam thlengin danglamna tam tak hmuh theih a ni.
Kum 2015 khan album hit tak, ’25’ a tichhuak a, single hmasa ber, ‘Hello’ chuan rimawi khawvel a chiah hneh rem rem nghal hle.
“He album thar buaipui chhung zawng hian keimah inhmuhchianna leh inhriatchian lehzualna ka tawng chho a, tunhmâ zawng aiin ka hahdam a, rilru lamah pawh damna ka chang a ni,” tiin Adele hian a sawi.