Brazilian winger Raphinha chuan an ram tan fak hlawh taka tunhnaia a inkhelh chu a chhunzawm a, nimin zingah Uruguay 4-1 a an hnehna kawngah a langsar berah a tang.
South America ram ten World Cup qualifier an khelhmekah Brazil hian Manaus a Arena Amazonia-ah Uruguay hi an mikhual a. Neymar hmanga goal hmahruai an khung hnuah Raphinha a inlar a. Chiang taka hnehna an chan avangin Brazil hi tling turin an dinhmun a tha tawh hle.
CONMEBOL qualifying-ah Brazil hian point rukin hma an hruai mek a. Pahnihna Argentina in an pha lo hle. A sang pali hi Qatar 2022 atana tling nghal an ni a, pangana in inter-regional playoff an khel ang.“ The Raphinha show”
Brazil in minute 10-naah goal hmahruai an khung a, Fred-a ball pass la in Neymar-a’n goal hmahruai fing takin a khung. Hemi hnuah Raphinha a inlar a. Ram tana inkhel bul a tan hmasak berah an khingpuite chaihphartu a ni.
Venezuela laka substitute bench atanga an chak chhan lo ni tawh Raphinha hian minute 18-naah an goal hnihna a khung a. Minute 58-naah an goal thumna counter-attack atangin mawi takin a khung.
Minute 77-naah Luis Suarez chuan freekick atangin Uruguay goal khat khung ve mahse awmzia a nei thui lova. Brazil tan Gabriel Barbosa chuan goal khat dang a khung leh thova, mualneitu lamin hnehna an chang chiang.
Raphinha hian tun international week a Brazil in vawi thum an khelh atang minute 145 a belhkhawmin a khel a, goal hnih a khung bakah midang goal khung tur vawi hnih a siamsak.
Neymar-a nen goal khung belh thei ve ve an ni a, second half-ah Uruguayan keeper Fernando Muslera chuan zing takin an pahnih lakah save a siam a tul a. Uruguay player kheltha ber chu an goalkeeper a ni hian Brazil chungnunzia a lantir chiang hle.
Inkhel zawhah Raphinha chuan, “Hei baka zan duhawm hi ka tan a awm leh thei chuang lovang. Ka naupanlai atanga ka suangtuah tawh thin chu a tak ramah ka chantir a. Goal ka khung thei kha a ti lawmawm zualtu a ni. Zanin hi chu ka theihnghilh tawh ngai lovang.” tiin a lawmzia a sawifiah.
Brazil coach Tite chuan an match hmasa pahnihah beisei an phak loh hnuah nuam ti takin mipui hmaah football an khel leh thei chu lawmawm a tih thu a sawi a. “Manaus mipui chungah kan lawm a, kan inkhel tinungtu in ni. Stadium-ah kan bus a thlen atangin boruak engkim in siam a, inkhelh inti nuam a. Vawiinah pawh min lo lawm dan avang khan team inkhel hi thui takin a nghawngin ka hria.” a ti ve bawk.
Argentina in an mamawh result an nei
A zawna match 25 tlawm tawh lo nimahsela Argentina in draw an neih leh thin avangin Brazil nen an inkar a zau a. Nimin zing inkhel dangah an mamawh result nei theiin Peru 1-0 in an hneh. Estadio Monumental Antonio Vespucio Liberti ah Peru in second-half penalty hmu mahse an khung thei lova. An tan 2022 World Cup khelh beiseina a tlem sawt hle.
Martinez-a’n minute 43-naah Argentina tan goal a khung a. Peru hian substitute Jefferson Farfan chu minute 71-naah penalty area chhunga tih tluk a nih avangin si phurh sutna huntha an neih chu Yoshimar Yotun chuan a hmang tangkai thei lova. Goal bar pet perin qualifier match 12 atangin a vawi sarih nan an tlawm.
Argentine goalkeeper Emiliano Martinez chuan goal an chhuah lo chu an vannei tih sawiin, “Penalty pet ngam, pet thinte hi player bik an ni sa tawh. A bak hi chu vanneihna vek a ni a tawh.” tiin a sawi.
Argentina coach Lionel Scaloni chuan tun international week chhunga match thum an khelh chu an player-ten an tuar tih a zep lova. “Vawiinah kan inkhelah kan chau tih a hmuh theih. Kar khat chhunga match thum khelh chu taksa a hek. Mahse kan tih tur kan ti thei a, point thum kan hmu, hei hi kan tum ber chu a ni.” a ti ve bawk.
Inkhel dangah Chile in 3-0 in Venezuela an hneh a. Erick Pulgar chuan goal hnih khungin Ben Brereton-a’n goal dang a khung a. Alexis Sanchez chuan an goal hnih khung zing ami a siamsak.