All India Football Federation in India rama national level Futsal tournament a buatsaih hmasak ber tur Hero Futsal Club Championship chu New Delhi-ah November 5-13 chhungin an khel dawn. India ram hmun hrang hrang atangin club 16 he championship-ah hian an inel dawn a, club te hi group li a then niin an inkhelh kual hunah group tina a sang ber ten semi-final an khel ang.
AIFF President Praful Patel chuan, "Hero Futsal Club Championship hi AIFF in India rama Futsal lian zawka kalpui a tumna zinga hmalakna a ni a. Kan bul tanna a tel team 16-te hi duhsakna ka hlan." a ti. AIFF General Secretary Kushal Das chuan, "Hero Futsal Club Championship hi AIFF hnuaia hmalakna thar a ni a, kan bul tanna chauh niin he hmalakna hian kan player-te hmasawnna kawngah nasa takin a pui dawn.
State Association hrang hrangte hnenah Futsal League mumal tak nei turin ka chah duh a, tualchhung club-te tan inelna buatsaih tam turin ka fuih duh." a ti ve bawk.
Team 16 tel zinga 12 te hi he inelna a tel turin an state league-ah theuh an champion a, Hero Indian Super League leh Hero I-League club-te sawm an ni a, anni zing atangin team pali an tel dawn bawk a ni.Team 16 tel turte :
Baroda FC (Gujarat), Chanmari Zothan Futsal (Mizoram), Kuppuraj FC (Puducherry), Super Strikers FC (Karnataka), Speed Force FC (Telangana), Sporting Clube de Goa (Goa), Delhi FC (Delhi), Real Kashmir FC (Kashmir), Telongjem FC (Nagaland), Classic Football Academy (Manipur), Mangal Club (Odisha), Niaw Wasa United Sports & Cultural Club (Meghalaya), Bengaluru FC (Karnataka), TRAU FC (Manipur), Mohammedan SC (West Bengal), Sudeva Delhi FC (Delhi)