Congress-in Lalsawta hovin 2023 inthlan hmachhawn dawn


Kum 2023-a MLA inthlanpui chu tuna MPCC vice president ni mek, Lalsawta hovin an hmachhawn dawn nia a lan thu MPCC general secretary, MLA hlui, R Vanlalvena’n a sawi.
He thu hi nimina Congress party-in Zoramthanga corruption case chungchanga ‘Dikna tung ding tura beihna’ programme, Vanapa Hall kawtah an buatsaihah a sawi a, R Vanlalvena chuan, “Lalsawta chuan a unaute pawisa a kawlsak ve lo vang,” a ti.
He huna Zoramthanga’n eiruk thubuai a neih dan sawi fiahtu, Congress thupuangtu, Dr Lallianchhunga chuan, kum 10 chhung leka Zoramthanga hausakna, Rs nuai 138 a\anga nuai 838.41 zeta a pun hman avang leh, a sum lakluh zat leh a hausakna a inmil theih ngang loh avangin June 22, 2007-ah PRISM-in ACB-ah FIR an thehlut tih a sawi a. September 15, 2010-ah ACB-in thubuai an ziak lut ta a, he thubuai bakah, Aii Puk-a sorkar bungrua hmanga puhna thubuai siamsak a ni tih a sawi.
Dr Lallianchhunga chuan ACB-in court-a Supplementary Charge Sheet an thehluh a\anga a lan danin Zoramthanga sum neih zawng zawng chu Rs nuai 909.70 a nih thu a sawi a, eiruk thubuai chu hun rei tak ngaihtuah a nih hnuah heng a pawisa neihte hi a unaupa, L. Nghakliana leh a u fapa, Zoramchhana ten an sum an kawltir niin court-ah an sawi leh ta tih a sawiin, “Thiamchanna an dapna mai mai niin a lang,” a ti.
He huna thusawitu dang, MPCC Secretary, AMC Councillor Rosiamngheta chuan Zoramthanga’n a thubuai kal zelah a unaute sum kawl anga insawia thiamchanna a dap ta chu a zahthlak takzet tih sawiin, “Tunah hian an insawi mam thei a ni mai thei; mahse, an sawi mam avang hian a dik ta tihna a ni chuang lo,” tia sawiin, dawt thu hmanga thiamchanna a thleng a nih ngai chuan engkim hre vektu Pathianin ro a rel ngei ang tih a rin thu a sawi.
Minister hlui, MPCC PAC member KS Thanga pawhin thu sawiin, ‘Dikna tung ding tura beihna’ hun an hman chhan chu Zoramthanga an huat vang emaw, tihchhiat vek an tum vang emaw, politics-a phuba lak an tumna vang emaw a ni lo tih sawiin, politics chu tihthianghlim an tum zawk a, dikna a par chhuah theih nana hma la an nih thu a sawi a; Mizoram leh Kristianna hmai a tihbalh zui zel loh nan chief minister chu a nihna atanga chawl turin an ngen tih a sawi bawk.

Leave a Reply

Your email address will not be published. Required fields are marked *

error: Content is protected !!