Thangthar zawkte tan party hotu lute an insiamrem zel a hun tawh?
Kum 2023 MLA General Election ah Mizoram Pradesh Congress Committee (MPCC) chuan an vice president Lalsawta hova inthlan an hmachhawn tur thu nimin khan sawi a ni a, president ni lai Lal Thanhawla’n politics lamah party mite a ho thei tak tak dawn lo tan niin a lang.
Pu Hawla hi kum lamah pawh a upa chho tan viau a, party lian pakhat hotu ni chunga midang a kutken thiam chho hi a fakawm viau mai. Party dangte pawh hian entawn chho thei se la, kan ram hi thangthar a ngaihna hre zawk leh khawvel finna leh thiamna mila kal thei turte hnena ken thiam hi a hun viau tawh a ni.
Rorellai MNF party hotute pawh hi mihring kum lamah pawh an upa tawh fu hlawm mai a, Congress leh MNF party te hi kan ramah chuan rorelna fawng lo inchelhchhawk nasatute an ni a, tunah hian an hruaitu lute chu kum lama upa tak tak an ni tawh hlawm. Party politics atanga an chawlh a, thangthar zawkte hnena an hlan hun hi a nghahhlehawm tawh hle a ni.
Tunah hian Congress hruaitute sawi danin, an president pawhin inthlan lo awm leh mai turah chuh zai rel lova, an vice president hova hmachhawn rih a nih tur thu an sawi a, Pu Hawla faktute thawm pawh a ring chho viau mai.
Kan sawi tak ang khan kan rama political party hrang hrang hruaitute hrim hrim hi an upa tawh hlawm fu mai a, chawlh zai an rel mai lo a nih chuan min kaihhruai tawh dan kan hre sa vek bawk nen. Beisei hi a sang lua lo hlawm a ni. Midang kuta an dah thiam a, an duh a nih chuan an party theuhah na na na chuan thu an la nei dawn, thurawn pe tur leh khalh ngil tur zawnga an lo awm ve mai mai tawh hi a hun fu in a lang a ni.
Congress ang bawkin MNF pawh hi hruaitu lute atanga an insiamrem thuai hi a hun tawh hle. Chuti a nih loh chuan mipuiah rin an hlawh lo telh telh ang tih a hlauhawm hle.