Mipuiin mipa naupang 10 chuang thattu serial killer chil hlum


Kenya khawthlang lama mipui thinrim pungkhawm chuan serial killer a nih thu inpuang tawh, ni hnih liam taa police kut atanga tlan bo chu an chil hlum tih police-ten an sawi.
Masten Wanjala-a hi Bungoma khaw miten in pakhatah nangchingin an sawisa hlum tih an sawi.
Amah hi kum nga chhungin mipa naupang 10 chuang a thah thu lo inpuang tawh a ni a, thuneitute kut atanga a tlan chhuah hnu hian nasa taka zawn a ni.
A inpuan dan chuan a hrai rui a, a chang chuan an thisen pawh a insak thin.
Thil thleng hmutu pakhat chuan Kenya-a Standard chanchinbu hnenah, amah lo hnawt chhuak tawhtu, a nu leh pa khuaah hian a tlan lut a, an thenawm khawvengten a haw tih an hriat chuan nangchinga phuar betin an sawisa hlum niin a sawi.
An man beh dawn hian nasa takin tlanchhiat a tum niin Bungoma police commander chuan a sawi.
A thih hnuah a chhungte pawhin amah ngei a ni tih an finfiah tawh.
Musyoki Mutungi chuan, “Engtin nge Nairobi atanga khua, thingtlang kilkhawrah hian a thlen theih kan hre bik lo,” a ti a. “An khaw mi zinga fing deuhten tunge a nih an lo hre chhuak a, police hrilh hmaa lo chin fel mai an rel ta a ni,” a ti.
Wanjala-a hian football coach anga inchhalin mipa naupangte hi hmun biru deuh laia an thlem chhuak a, a that ta thin a ni.
A chang chuan a ru bo va, tlanna sum a phut thin bawk.
July thlaa man a nih khan police-te chu a mi thahte a phumna hmunah a inhruaitir a, an ruang hai chhuah leh a ni.
Nilainia a tlan chhuah lai khan police officer pathum an duty lai a ni a, a tlan chhuah theihna tura puitu leh fimkhur lova puhin hremna pek an ni.
Police-te hian a tuk zinga roll call-naah a awm lo tih an hre chiah a ni.
A tlan chhuah avang hian Kenya-a police hotu chu bâng tura nawrna a nasa hle a, an ram pumah chuan an titi ber a tling.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427