ZPM party thalaiin national health mission (NHM) hnuaia rei tak thawk tawh nurse te Mizoram sorkarin a ngaihsak tawk lo nia sawiin, tun aia ngaihsak tura an phut thu an sawi.
NHM hnuaia nurse ten an dinhmun chhiat zia leh manganthlak zia vawi duailo health minister leh chief minister hnenah lo thlen tawh thin mahse, sorkar atangin thu lawmawm an la dawng chuang lo niin ZPM thalai chuan an sawi a. NHM hnuaia thawk nurse tanglai Mizoramah 300 chuang an awm thu leh an zingah kum 15 chuang thawk tawh 42 leh kum 10 chhung thawk tawh 70 an awm thu an sawi.
ZPM thalai chuan NHM nurse te chu Mizoram hmun hrang hranga thawk, hri leng do kawngah pawh thawhhlawk leh mipui pawhin an thlamuanpui te an nih thu an sawi a. Kum tam tak an thawh hnuah pawh sorkar atanga MR pawh an bill thei lo nia sawiin, an dinhmun zirchianga, dinhmun tha zawka dah thuai tura Mizoram sorkar an phut thu an sawi bawk.