Lengte rama tui thianghlim in tur siamna khawl thar nimin khan Mizoram Industries Owner Association President F. Rodingliana’n a hawng.
Lengpui bul, Lengte rama Aquaplus Package Drinking Water-in tui thianghlim in tur siamna khawl an bun thar hawnna inkhawm tawi neihah thu sawiin F Rodingliana chuan, Mizoten hnam rilru put deuh deuha mahni siam chhuah hlut thiama inchawikan tawn a ngaih thu a sawi a. Chutih rualin, industry neitute pawhin fimkhur leh uluk taka an thil siam chhuahte an enkawl a \ul thu a sawi.
Mizo \halaiten sorkar hnaa inbenbel mai tum lova industry lam an haw \an chu lawmawm a tih thu sawiin, “Sorkar pawhin kan industry ram neih chhunte pawh hi industry din tak tak duhte tana phalrai deuh turin kan duh a, politics khelh nana hmang mai lova kan \halaite hmakhua thlira humhalhsak turin kan ngen a ni. Kan tun dinhmunah industrial estate-ah industry neitute kan chep zawk tlat laite pawh hi sorkar hian min enpui a ngai hle a ni,” F Rodingliana hian a ti.
Mizoram Industries Owner Association president hian Mizoramin package drinking water-ah hma a sawn thu sawiin, tunah hian tui siamna khawl hi vawiina a hawn nen hian pasarih lai bun a ni tawh thu leh la buaipui mek pawh an awm thu a sawi bawk.
Hauzikpuii, Hunthar veng enkawl, Aquaplus Package Drinking Water hian Unitech Water Solution-a mi khawl hi leiin, Asian Water Solution-in ISI leh a khawl remkhawm hna an thawhsak a. He khawl hi darkar khata litre 2000 siam thei a ni a. Bureau of Indian Standards (BIS) consultant-in laboratory hi India hmarchhakah chuan a \ha ber pawlte zinga mi a nih thu a sawi nghe nghe.