Chelsea in Premier League season hlawhtling an hmanna turin rilru puthmang dik an nei a ni tih an lantir a. Brentford in huntawp dawn lamah nasa takin an goal nawr mahse an goal an venghim a, 1-0 in hnehna an chang.
Brentford Community Stadium-ah England left-back Ben Chilwell chuan first half-ah inkhel a goal awmchhun a khung a. Ram leh club tan match thum chhungin a goal thumna a khung.
West London derby-ah hian Blues tan hnehna chan a awlsam lova, inkhel tawp dawn lamah Bees in si phurh sut an tum ngawrh a, Blues tan inven uluk a ngai. Mahse Thomas Tuchel-a pawlten an mamawh result an nei a, Premier League table chung berah Liverpool in tlansan hman zuai mahse Inrinni zanah an dinhmun ngai an luah leh thei.
Mendy-a’n a chhandam
Thomas Frank-a pawlte lakah European champion lai in first half an thunun a, goal erawh halftime dawnah an khung chauh.
Second half ah inkhel a danglam viau a, si phur zawk Bees goal nawr a na. An forward Bryan Mbeumo chuan first half ang bawkin goal ban a tihper leh a. A tawp minute 15 chhungin Chelsea keeper Edouard Mendy chuan save tha leh pawimawh tak vawi hnih neiin a team a chhanhim a. Blues defender Trevoh Chalobah pawhin goal line pel tur a pet chhuak.
Chelsea manager Thomas Tuchel chuan, “Minute 65-70 chin kha chu ka lawm viau a, mahse khatih chhung khan kha aia tam goal khung tur kha kan ni a, kan khung loh avangin Brentford fak loh theih an nei lo.”
“A tawp minute 20 erawh cup inkhel ang a ni a, anni lamin venthawn tur awm miah lovin min nawr thei si a. Min nawr na laklawh lutuk kha player pakhatin kan tlem ta zawk emaw tih mai tur a ni a. Keini lamin goal ven ringawt kan tum avangin inrintawkna an nei lian hman hle.” tiin a sawi.