Chalrosanga Ralte chuan nghet taka Tuirial bial tan a din tur thu sawiin, “Kan lo vanduai palh ta a nih pawhin ka hawisan tawh ngai lo vang che u,” a ti.
Inrinni khan North Chaltlangah Tuirial bial bye-election lo awm tura Indian National Congress (INC) official candidate Chalrosanga Ralte hian thu sawiin, bialtu MLA atana thlan tlin a nih chuan a theihna zawng zawng a hlan dawn thu a sawi.
“Min thlang tling a nih chuan Tuirial bial mipuite hian hotu ni lovin in tana hnathawktu tur in thlang chhuak dawn tihna a ni ang. Ka theihna zawng zawngin in tan inpek ka tum a ni,” a ti.
INC candidate hian, “Min thlan tlina bialtu mawhphurhna mipuiin min pek chuan mi harsa leh mi retheite tan innghahna tlak ka ni ang. In hmaah ka ding a, harsat manganah pawh in tan ka ding ang. Pathian zarah kan lo tling a nih chuan in tan hna ka thawk ang. Kan lo vanduai palh ta a ni pawhin ka hawisan tawh ngai lovang che u,” tiin Chalrosanga Ralte hian nghet taka bial tana a din tur thu a sawi.
Tun anga lungrual taka Congress party chu an thawkho chhoh zel chuan hnehna an chang thei dawn tih a sawi a, Tuirial bialah nghet taka theihtawp chhuaha bial chhung leh mipui tana thawh a tum tlat thu a sawi bawk a ni.