Sorkar zarah SEDP lam hawiin kan kal ve zel e!?
Health Minister chuan tun hnaia Tuirial bial bye-election neihna tura a zin kualna thenkhatah SEDP lam hawia an kal tan tur thu a sawi a, mi tam tak mak tih a hlawh zawk hle!
Kan hriat angin Covid-19 hri lengin khawvel a nuai a, sorkar tan pawh hnathawh tak tak theih a ni dawn lo tih a chiang reng. Mahse, SEDP tura pawisa awmsa tam tak an nei a nih chuan total lockdown min puan hnan dum dum lai khan hman chhuah tur awm ang ang chu hmanchhuah a, siamrem theih a ni ngeiin a rinawm. Chung zawng zawng pawh tichuang lem hlei lo chuan tunah an sorkarin flagship program a an neih leh an auhla SEDP lam hawia kal an tum thu an sawi thar leh laih laih chauh mai a, engtinchiah nge SEDP hi min kalpui tan an tum tih hi zawhna awm thei tak a ni ta mai.
MLA inthlanpui hrim hrim hi a hla leh tawh lo a, kum 2023 ah inthlan a awm leh mai dawn. An sorkar atangin rorellaite hian an duh chuan hnathawhna hun tha an nei hle tawh. Tuna SEDP lam hawi an tum laih laih chauh hi chu a tlai tawh mah mah deuh chuan a hriat a ni.
Minister hian, “SEDP pawh a theih chen chenah hma kan la zel ang. Budget thar lo awm turah chuan SEDP lam hawia kalin, tihhlawhtlina kalpui ngei kan tum mek a ni,” a ti chauh mai hi an party hotu sang lam inlungrual loh vanga hma la chak thei lo nge an nih a, an tih tum mek hi a la khirh deuh dawn tih hriatthiam a har a, mipui lam pawhin ring kan lo fan ve reng a nih tih hria se; thalaite kan fing chho ve zel tawh a, theih loh intiam reng hrim hrim hi chu eng party pawhin ti tawh lo se kan ram damna tur a ni zawk tih i hre thar mawlh teh ang u.