Premier League champion in hnehna an sual chhuak

Manchester City in Burnley lakah an football duh ang khel thei lo mahse hnehna an chang thova. Inrinni zanah 2-0 in hnehna an chang.
Man City starting XI-ah tunhnaia a inkhelh tam loh avanga a chungchang sawi hlawh Raheem Sterling telh a ni a. Forward Ferran Torres inhliam avanga an khelh tir Sterling hian goal khung lo mahse Bernardo Silva leh Kevin de Bruyne ten City tan goal an khung.
Etihad Stadium-ah hian Clarets an len luh hnuhnung pali ah City hi 5-0 vekin an chak a. Silva-a’n minute 12-naah Phil Foden thawhrah atanga goal a khung nghal avangin City in goal an khung leh nual dawn a ang.
Mahse Clarets an ding khawng ve tlat a, City in ball chang tamin goal chance hlauhawm insiam nual thei mahse goal an khung thei lova. Goal hma ah an hriam loh avangin Burnley zawkin barakhaih let turin vawi engemaw zat an tihthaih hman.
Mahse minute 70-naah De Bruyne chuan inkhel dahtha turin goal a khung a. City in buai lovin an mamawh result an nei.
Sterling hian tun season-ah a vawi thumna atan league inkhelah bul a tan a, tlarhmaah a laiah chhawr niin a kheltha tawk lova, ball vawi 11 chauh a tawk a, goal-ah vawikhat pet in dansak a ni bawk.
Manchester City manager Pep Guardiola chuan playmaker Silva fakin, “Tunah hian a khelhthat vanglai tak a hmang mek a, Rodri nen hian tunlaiah anni tluk hi an awm lo. Tun season tan tir atang khan Bernardo hi point 98 kan hmuh tum season a a inkhel ang char char khan a la inkhel.” tiin a midfielder tangkaizia a sawi.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427