Assam-ah Bangladesh-a Hindu tawrhna duh lohna lantir


Assam-a Barak phaikuama district pathuma mi sing chuangte chuan tun hnaia Bangladesh-a sakhaw zuitu tlem zawk, Hindu-te laka tharum thawhna thleng duh lohna nasa taka lantir a ni.
Mipuite hian Bangladesh hnam puanzar an hal a, Indo-Bangadesh international border kân an tum a, Bangladeshi thil siam hrim hrim hman loh leh lei loh ni se an ti bawk niin thuneitute chuan an sawi.
Bangladesh-a thil thleng duh lohna hi Vishwa Hindu Parishad (VHP)-in an huaihawt niin pawl dang – Bharat Sevasram Sangha, Sankar Math, Gauriya Math, Bajrang Dal leh RSS women’s wing te pawhin an zawm.
Kushiyara luiin ram pahnih a rina, Karimganj district-ah chuan mi tam tak chuan Bangladesh-a luh an tum a. Hailakandi-ah Bangladesh hnam puanzar hal a ni bawk.
Mipuite hian memorandum siamin Prime Minister Narendra Modi hnenah an thehlut a, sorkar chu Bangladesh nena insumdawn tawnna zawng zawng tihtawp turin an phut a. Bangladesh chuan an ram atanga Hindu-te hnawh chhuah vek an tumna a nih thu leh tharum an thawh hi hemi an phiarna niin an sawi.
Karimganj district-a MLA lo ni tawh, BJP hruaitu hlun, Ranjan Das chuan, “India hian sumdawnna lama Bangladesh nena inzawmna hi tun hmaa Pakistan laka kan tih anga a tihtawp chuan an tam mai ang. India hi Bangladesh-in ei tur lam a siam la lut tam ber a ni a, an siam reng reng hi kan boycott dawn. Prime minister hnenah pawh Bangladesh-a Hindu chengte hian hrehawm an tuar tawh tur a ni lo tiin na takin lehkha kan thehlut,” a ti.
Karimganj BJP President Subrata Bhattacharjee pawhin, “Bangladesh hian Pakistan lak atangin India-in chhanhimin ram hran a nih phah tih a theihnghilh ta a. Kan sipaiten kum 1971 indovah Pakistan an hneh a, duh ni ila khatih lai khan an ram pum hi India ram ni thei a ni a. Vawiina Bangladesh-a Hindu-te kutthlaktute hian khatiang kha kan duh chuan kan la ti thei reng tih hre rawh se,” a ti.
Karimganj district-ah hian kawng an zawh hnuah Kushiyara lui kamah pung khawmin mi thenkhat chu luiah an zuang lut a. “Bangladesh-ah Hindu-te hum turin ka kal dawn,” an ti a; mahse, ramri vengtuten lo dangin ti tawh lo tura an ngenna an zawm hlauh.
Cachar district-ah chuan Subhash Nagar khelmual atangin kawng an zawh tan a, deputy commissioner pisa tualah an pung khawm.
VHP hruaitu, Mithun Nath chuan, “Bangladesh-a an tihnawmnah ang tho kha kan bia a, an suasam laia mipui hlima lâm hmuh khan min barakhaih a ni. Hindu-te laka thil thleng leh Maa Durga lim an suasam kha an hre lo. Khawvel puma Hindu-te hi inngaihtuah harha kan inpumkhatna tur kan zawn a ngai a ni,” a ti.
VHP hruaitu, Purna Chandra Mandal pawhin, “Cumilla pandal-ah khan Durga limah khan Muslim pain Quran a dah tih chiang taka finfiahna a awm a. Bangladesh-ah khan district 30 velah pandal 200 vel a awm a, Muslim-ten an suasam vek a. ISKON temple, Durga Puja hman miah lohna pawh an bei a, mi an that bawk a. Hei hi Bangladesh atanga Hindu tihbo tumna a ni chiang a ni. Hetiang hi a thleng zel a nih chuan Bangladesh-ah mi tam tak lutin kan unaute chhan turin kan kal mai ang,” a ti.
India rama Muslim-te pawh Bangladesh-a Hindu laka an unaute chetna dem turin a ngen bawk.
Silchar-a hun hmannaah hian Bharat Sevasram Sangha, Sankar math?leh VHP hruaitu dangten thu an sawi bawk.
Hetih lai hian hruaitu thenkhat pawhin Bangladesh-a Hindu-te laka tharum thawhna thleng hi an sawi a, India sorkar a ngawi tlat chu mak an ti.
Assam assembly-a deputy speaker thin leh BJP hruaitu hlun, Aminul Haque Laskar chuan, “Sheikh Hasina khan an rama Hindu-te chuan an sakhaw thil leh kûtte chu an lawmin an ti thei vek tih a sawi tawh a; mahse, Durga Puja-a thil thleng leh tuten emaw Hindu an bei a thlir dan hi a dik lo a ni. Bangladesh-a Hindu-te pawh him takin an awm tur a ni a, hma a la tur a ni,” a ti.
West Bengal-a Rajya Sabha MP leh Silchar MP hlui, Sushmita Dev pawhin Prime Minister Modi-a a ngawi tlat chu mak a tih thu a sawi a. “India hian Bangladesh hi sumdawnna lamah pawh a thlen thuipui ta deuh a ni. Tunah hian Hindu-te thah an ni a, Narendra Modi a ngawi a. Assam Chief Minister Himanta Biswa Sharma pawhin Bangladesh-ah Hindu an him tih a sawi a, an tan India-a lo luh chhan tur a awm lo a ti a; mahse, an himzia chu tunah kan hmu ta a ni,” a ti.

Leave a Reply

Your email address will not be published. Required fields are marked *

error: Content is protected !!