MNF party adviser Robert Romawia Royte-in MNF party president, chief minister Zoramthanga chu mi dik leh Pathian tih mi a ni tih miten an hria a, Zoram dung leh vangah MNF zawmtu an pung mek niin a sawi.
Zuangtui Veng, Aizawla MNF zawmtharte a lawmluhnaah nimin khan he thu hi Robert Romawia chuan a sawi niin MNF party thuchhuahin a tarlang a. Chief minister bial mi ten MNF party an zawm zel chuan a bialtu an rintawk zia a tilang nia sawiin, kum 2023 MLA inthlanah chuan Zoramthanga chakna chu a sang hle dawn tih a hriat niin a sawi.
Robert Romawia chuan, Congress party chu hruaitu an inthlak atangin an hniam nghal sawt sawt nia sawiin, an vice president tharin Congress party rei tak lo hruai tawhtute mitmei veng lovin thu dengkhawng tak tak hmangin Congress hruaitu hmasate tih dik loh pholang zawngin mipui hriatah thu a sawi thin nia sawiin, chu chuan Congress dik takte rilru a tina niin a sawi a. Lal Thanhawla’n Congress party a chawlhsan rualin mi tam takin Congress party an chhuahsan ve dawn tih a chiang niin a sawi.
Mizoram Congress vice president thar Lalsawta chu qualifying round-ah ‘ama own goal-in’ a tla nghal der tawh niin Robert Romawia chuan a sawi niin MNF thuchhuah chuan a tarlang.
Robert Romawia chuan ZPM party pawh an hotute chu Mizo mipuiin an hriatchian em em te vek nia sawiin, anmahniah mipui an beidawng tawh niin a sawi a. ZPM hotute mipuiin an thlir dan chu ZPM zawhah eng pawl nge an din leh ang tih chu an zawhna leh mipuiin an chan mek, an chan chhuah leh ngei tur nia a lan thu a sawi niin MNF thuchhuah chuan a tarlang bawk.