Naupai awlsam hun i hre duh em? by Robert Zoliana

HMEICHHE HUANG:
naupai awlsam hun i hre duh em?
by Robert Zoliana

A tlangpuiin hmeichhe tam zawk hian naupai theih hun rangkachak (Ovulation period) hi an hrechiang lo thin a, thlatin thi neih nena inzawm-na nei emaw hemi nena inlaichinna nei angte’n an hre thin.

Naupai theih hun rangkachak hrechiang tur chuan ovulation period hi hriat makmawh a ni a, hemi hun chhunga nupa nun (sex) hman a nih chuan naupai theihna remchang zau tak a inhawng thin. Naupai tumna a awm tawh chuan ovulation (Tui/egg chhuah hun te pawh a tih theih ang) awmzia hriat a tul hle.

A hmasa berin, ovulation hi mawlmang taka hriat phawt tur a ni a, tuibawm atanga tih-chhuah tui puitling tawhte chu fallopian tube kaltangin zinkawng an tan ta a, an mahni lam pana lo kal ve tho mipa chi nena intawn ngei beiseiin an lo nghak thin a ni. An han intawng fuh ta chiah a, chhul lama awmhmun khuarin, chi thlahna a intan ta.

Ovulation kalphung
Tuibawm atanga tui tih-chhuah a nih khan a tlangpuiin darkar 12 atanga 24 thleng an dam thin.
Ovulation cycle a lo thlen apiangin tui a tlangpuii pakhat tihchhuah thin a ni.
Ovulation hi thi neih khan a lo zui nghal ngai lova, a chang erawh chuan period laiin eng emaw thi khal te a lo awm ve thei tho.
Hmeichhia ni tura i lo pian chhuah phat khan tui puitling lo maktaduai tam tak i pai tel nghal a, ovulation cycle lo inherchhuak tur nghakin an awm thuap mai a ni.
Natna benvawn emaw rilruhahna/buaina nasa takte hian ovulation-ah nghawng an thlen vek a, stress neih nasat te hian a buai thei.
Ovulation kaltlang hian tui awpkeu tawhte chu ni ruk atanga ni 12 hnu lamah Chhul-ah an insawhnghet thin.
Hemi hun chhung hian hmeichhe thenkhat te chu taksa nâ leh pum nuam chiah lo angte’n an awm thin a ni.
Ovulation hi a lo thleng lo a nih chuan thi neih hi awm thei tho a ni a, thi neih i missed a nih pawhin ovulation hi thleng thei tho a ni bawk.

Ovulation chhui ang
Thlatin hunbi hi thi neih Ni hmasa ber atanga chhiar tan a, a lehpek thi neih Ni hmasa ber kha a huam dawn a. A tlangpuiin, ni 28 atanga 32 a ni thin. Mahse, hei aia rei emaw tawi deuh te pawh awm thei tho a ni.
Ovulation period hi lehpek thi neih hun intan atanga ni 12-16 ah chhui zawn theih a ni.
Thlatin hunbi a Ni 11 leh 21 inkar hian Ovulation hi a lo thleng tlangpui a. Thlakhat chhunga naupai theihna hun remchang ber a tih theih awm e. Hemi hun chhunga hian invenna tel lova sex hmaan a nih chuan naupai theihna ‘chance’ a sang hle.
Ovulation hi thi neih intan hmâ ni 14 velah a lo awm thin a, ni 28 dan zela thi nei thin i nih chuan ni 14 atangin a intan ang a, naupai theih hun remchang em em mai chu 12, 13 leh 14 te hi a ni.
Ni 35 dan vel anga thi nei thin i nih erawh chuan ovulation hi ni 21 velah a lo thleng dawn a, naupai theihna Ni remchang te chu 19, 20 leh 21 te a ni ang.

Leave a Reply

Your email address will not be published. Required fields are marked *

error: Content is protected !!