Central Congress-ah kan innghat lo, unit-a kohhran chhal ang kan ni lo : Hawla

Mizoram Pradesh Congress Committee (MPCC) President Lal Thanhawla chuan Mizoram Congress party chu central Congress-a innghat a nih loh thu leh tute party emaw anga kohhran hi unit anga inchhal ang an nih ve loh thu a sawi.
Nimin khan Congress Bhavan-ah All India Congress Committee (AICC) General Secretary i/c Mizoram Mr. Bhakta Charan Das, Union Minister hlui chuan Mizoram tlawhin, a puala inkhawm buatsaihah thu sawiin Lal Thanhawla chuan, Congress chu engmah an ni tawh dawn lo, an ding chhuak tawh dawn lo ti thin mah se, Mizoram Congress hi central congress-ah an innghah ngai loh thu sawiin, “Kan innghahna chu nghing ve thei lo chatuan lungpui Isua Krista tih hi Zoram mipuite ka hriattir nawn dawn a ni,” a ti.
Tute party anga inti kohhran mi bik, Mizoram People Forum (MPF) leh Synod te pawh unit anga chhal ve chi an ni lo ve tih hriatsak se a duh thu sawiin, “Amaherawh chu, anni duh loh zawng tih etawh chu kan duh lo a. |um khat kan ti a, kan sim vek tawh dawn nghe nghe,” Lal Thanhawla hian a ti bawk.
MPCC president hian vawi tam tak jail tantir tuma amah hektute chu an la hlawhchham zat zat tih sawiin, “Rev Zairema’n min tantir a tum tawh a, Supreme Court-ah vawi hnih/thum min hek tawh a, a hlawhchham lai let der a,” a ti a. Tuna Chief Minister Zoramthanga pawh hian rinawmna thu tiam a lak zan la lain, police tirin tantir ngei tuma hma a lak thu sawi bawkin, “Min hekna lehkha thir thingrem khat hi document file hlui pui pui a thehlut a. Thuhretu 40 chuang a nei bawk a. Keiin pakhatmah ka thehlut ve loh avangin roreltu judge pawhin mak a ti hle. A thuhretute koh an ni thin a, pathum pali vel an koh thleng pawh khan ka thuhretu ni zawk awm takte an ni,” a ti a. Heng thute hi a inchhuan vang ni lovin dikna a lal zel thin vanga sawi a nih thu a sawi.
Lal Thanhawla hian, Mizoram tana chhuan tam tak lo kal leh zel turte tan pawha rotling leh hmasawnna ruhrel lian tham a neih te hi Congress kutchhuak a tam thu sawiin, power siam chhuah zawng zawng te, Bairabi rel kawng tih len te, Sairang thleng rel lo kal turte, ramri-a insumdawn tawnna Border trade leh ram dang nena inkapawhna kawng siam lai mek zawk zawkte hi Congress kutchhuak deuh vek a nih thu a sawi a. “Cheng vbc. 42 zet Falkawn Referral Hospital siam nan dah a ni a, MNF sorkarin a chen zo vek a, ar inah leh kel inah te an chhuah mai mai a. Kan ui hle,” a ti.
“Pathian khawngaihna zarah kan lo sorkar leh hnuah Referral Hospital tha tak din leh hmanin, staff quarter turte sum siam nana a hman ho pawh thiat leh vekin hmantlakah kan siam a. Referral Hospital satliah mai duhtawk lovin, kan rama thlai damdawite pawh fel taka zirchianna hmun pui ni thei tur leh research tih theihna tur MIMER kan din a. Central-a an pute BJP ang maia hming thlaka buai mai mai chi MNF sorkar kan nei a, medical college satliah, ZMC-ah an siam leh ta a ni,” a ti bawk.
Bhakta Charan Das, AICC G/S pawhin thu sawiin, Congress party hian Mizoram a ngaih pawimawh thu leh India ram state changkang zawkte nen pawh angkhat veka a en thin thu a sawi a. Mipui maktaduai tam tak chenna ram India tihhmasaw nan Congress party hian tha leh zung tak tak lo seng tawh thin mah se, India ram puma roreltu BJP hian a haider lui tlat thin tiin, “Congress party hi India ram mipui zawng zawng huap party awmchhun a ni a, rah beh tumin bei thin mah se, a thochhuak leh zel thin a ni,” a ti a. BJP-in nasa taka India ram an sawp chhiat tawh hi siam tha leh turin Congress party hi Mizoram leh India ram pumah a thochhuak leh ngei dawn niin a sawi.
He hun hi Lalsawta, MPCC Vice President-in a kaihruai a, Lok Sabha MP Candidate hlui Er. Lal Hriatrenga Chhangte, Kulikawn chu Congress party-ah Lal Thanhawla’n a lawmlut nghal bawk.

Leave a Reply

Your email address will not be published. Required fields are marked *

error: Content is protected !!