Lo neituten tun hnaia Lakhimpur Kheri, Uttar Pradesh-a tharum thawhna thleng duh loh lantir nana Punjab, Haryana leh Rajasthan-a relkawng an dan vangin hmun 130 vela rel tlan 50 vel chu a kal dan a buai phah.
Uttar Pradesh takah erawh chuan engmah rel tlan buai phah a awm lo va, Additional Director General of Police (Law & Order) Prashant Kumar chuan tihbuai tum chu na taka hrem an ni dawn tih a sawi.
October 3-a Lakhimpur Kheri district-a thil thlengah khan mi pariat an thi a, an zinga pali chu lo neitute niin lirtheiin an hnung lam atangin a pawng chil nia hriat a ni.
Darkar ruk awh ‘rail roko’ protest hi Thawhtanni tlai dar 4:00 thleng khan kalpui a ni a. Lo neitute hian Union Minister of State for Home Affairs Ajay Mishra leh lo neitute sut laia lirtheia chuang ve nia sawi, a fapa, Ashish Mishra te chu duh lohna an lantir a. Mishra pafa hian engmah inrawlhna an nei lo ve ve niin an sawi thung.
Union minister hian thil thlen lai khan a fapa hi hmun dangah a awm tih finfiahna tha tawk a nei tih a sawi a, Ashish Mishra hi October 9 khan man niin lung inah dah mek a ni.
North Western Railway (NWR) zone huam chhungah Rajasthan leh Haryana-ah rel kal eng emaw zat buaiin pahnih chu an zin tur thulhtir an ni a. Rel 13 chu chhuak mah se an thlen chin tihtawi an ni a, pakhat chu a kawng thlaksak a ni bawk tih PTI chuan a tar lang.
Rajasthan-ah pawh Bikaner division huam chhunga Hanumangarh leh Sriganganagar-ah rel eng emaw zat tlan dan a buai bawk.
Northern Railway zone huam chhungah pawh buai a awm nual a, Chandigarh-Ferozepur Express pawh a tlan thei lo.
Ludhiana atanga zing dar 7:00-a chhuak tur ni mah se Ferozpur-Ludhiana section-ah lo neituten kawng an dang tlat a ni.
Lakhimpur Kheri-a thil thleng duh lohna hi lo neitu pawl hrang hrang inzawm khawmna, Samyukt Kisan Morcha (SKM)-in an huaihawt a ni a. Anni hi nikuma sorkar laipuiin lo neihna kaihhnawih dan thar a siam duh lohna an lantirah pawh a meizang hlaptu ber an ni.