ASEAN hruaituten an intawh khawm tura an sawm ve loh, Myanmar army chief, Min Aung Hlaing-a chuan February 1-a an rama mipui sorkar an paihthlak hnuah anni chuan boruak muanawm siam tumin an bei reng a, tun thlenga an la buai chhan chu anmahni dotuten tharum an hman nasat vang niin a sawi.
Sipai chakna hmanga sorkar paihthlatu, Min Aung Hlaing-a hian kartawpa Association of Southeast Asian Nations (ASEAN)-in intawh khawm an neih turah Myanmar ram aiawh turin politics-a inhnamhnawih loh a sawm daih hnuah Thawhtanni khan an state television-a thu a sawi.
ASEAN member 10-te hian 26-28 chhung hian intawh khawm an nei dawn.
“Tharum thawhna hi firfiak pawlte chet an thawh zel vang a ni,” tiin Min Aung Hlaing-a hian television-a thu a sawiah hian a sawi a. “Tumahin tharum thawhna hi engah mah an ngai lo va, thil chin fel an duh ringawt a. ASEAN pawh hian hma a la tur a ni,” a ti.
Myanmar ram hi sipaiin rei tak an awp hnuah mipui rorelna lam hawiin a kal hret hret zel a, hetih lai hian nikum kum tawpa parliament inthlanpui neihah Aung San Suu Kyi-i kaihhruai, National League for Democracy (NLD) chuan rorel chhunzawm tura hnehna an chan hnu lawkah inthlan result dik lo tih chhuanlamin sipaite hian thuneihna an chhuh lui leh ta a ni.
Sipaiten thuneihna an chang leh ta hi an ram pumah mipuiin nasa takin duh lohna an lantir nghal a. A che na zual, ramri hnaih lama mite chuan sipai pawl dinin sipaite do letin hma an la ve a ni.
Mihring dikna chanvo humhalhtu pawl, Assistance Association for Political Prisoners (AAPP) chuan sipaiin thuneihna an chan atang khan mi 1,178 vel an that tawh niin an sawi a, heng zingah hian naupang pawh thahnem tak an tel tih an sawi.
Sipaiten thuneihna an chan hnua anmahni duh lova mipui sorkar ding thar, National Unity Government (NUG) chuan ASEAN thutlukna chu lawmawm an tih thu an sawi ve thung.
NUG hian anmahni chu sorkar tak tak zawka pawm tur an nih thu an sawi bawk a. September thlaa din, NUG-ah hian sipaiten an paih thlak, NLD hruaitu lawk tak takte pawh an tel.
“Min Aung Hlaing-a a tel lohna ASEAN hi rahbi pawimawh tak a ni a; mahse, keini hi he ram aiawhtu dik tak kan ni tih min pawm turin kan ngen a ni,” tiin an thupuangtu, Dr Sasa chuan a sawi.
April thlaa sipaite leh ASEAN-in muanna a awm theih nana kal zel dan tur kawng nga an siamah ASEAN special envoy chuan pawl hrang hrang leh Suu Kyi pawh hmu tura tih a ni a, ani hi February 1 atanga hren kha a ni.
Hetih lai hian sipaite leh anmahni dotute hi an la inbei chhunzawm reng a, a bikin hmarthlang lama Chin state-ah a nasa zual a, mi tam takin chenna an chhuahsan a. Kar hmasa mai khan sipai hian ASEAN palai chu Suu Kyi hmuh an phalsak lo bawk.
Myanmar hian February-a sipai sorkarin thuneihna an lak duh lohna lantirtu an mi man mi 5,000 chuang an chhuah.
Gen Min Aung Hlaing chuan mi tang mi 5,636 chu mihring dikna chanvo palzut lohna turin an chhuah dawn tih a puang.
General hian ASEAN intawh khawma sawmna a dawn ve loh hnu lawkah hei hi a puang a, sipai sorkar chuan an rama tharum thawhna thleng titawp turin hma an la tha tawk lo tih vangin sipai aiawh hi sawm an ni lo.
February 1 atanga buainaah hian mi 7,355 man an ni tawh a, thenkhat chu Suu Kyi tana rinawm tak, sipai sorkar pheh thluk leh theih nana beia dotu an nih thu AAPP chuan a sawi.
General hian mi tangte hi Buddhist chawlh, October thla tawpa Thadingyut lo thleng tur pualin mi tang hi an chhuah dawn tih a sawi.
Junta chief hian sipai hotute chuan an rama muanna a awm theih nan leh mipui rorelna tun din a nih leh theih nan an theihtawp an chhuah reng niin a sawi bawk.
A sorkar chuan mipui rorelna a siam leh ngei dawn tih a sawi.