Neitu thar hnuaia an awm hnuah Newcastle United in a vawikhat nan inkhel an hmachhawn a. Mahni mualah an mikhual Tottenham Hotspur lakah 3-2 in an tlawm.
Club non-executive chair Yasir Al-Rumayyan nei a neitu thar zing ami Amanda Staveley ten a hmunah inkhel an en a. St. James’ Park thawm ring tak karah minute 2-naah Magpies in Callum Wilson hmangin goal an khung.
Mipui lawm au thawm a ring a, inkhel tan hma atang tawha an club neitu an inthlak tak avanga lawm mipuite an au rei lo.
Minute 17-naah Spurs an che a. Midfielder Tanguy Ndombele chuan an si phurh sutin minute nga hnuah Harry Kane-a’n tun season a a league goal hmasa ber a khung a. Newcastle in ‘offside trap’ siam mahse VAR hmanga endik hnuah a goal hi an pawm.
Steve Bruce-a’n bul an tan dan thlirin manager anga inkhel a enkawl vawi 1000-naah beisei nei sang hman viau mahse tunhnaia che tha bik lo Spurs in a beiseina mei an tih mit sak thuai.
Halftime dawnah inkhel entu mipui nikhaw hre lova tlu a awm avangin khelmual chhunga team-te leh thuneitute lam atanga medical team ten an buaipui a, inkhel a khaihlak hnua khelh chhunzawm leh a nihin Son Heung-min-a’n tun season a a goal li na a khung.
Second half-ah Bruce-a pawlten substitute Jonjo Shelvey chu yellow card a hmuh nawn vangin an chan a. Eric Dier-a’n an lamah ti lut mahse Magpies tan thawh leh ngaihna a awm tawh lo.
Nuno Espirito Santo pawlte hi panganaah an chho a, lehlamah Magpies a mawng ber dawttu ah chhukin Bruce hi club tantute atangin bang tura duhna au thawm an inkhelh lai atang tawhin a ri ring a. An hausak hnuah club inthlak danglam vat an duh.
Manager te kamchhuak
Spurs a beisei anga bul tan bik lo manager Nuno Espirito Santo chuan, “Bul kan tan tha lova, an tang dawn tih kan hre sa. Mahse kan bul tan dan khatiang a nih hnuah a tawp kan thlen dan a tha hle. Ka player-te ka chhuang hle.” tiin a sawi zui a. “Goal tam zawk khung kha mimal takin duh mah ila Newcastle hi team tha leh defender nei tha an ni.” a ti.
Lehlamah Steve Bruce ve thung chuan, “Ka hna hi chu midang, a ngaihtuahtu turte kutah a awm. He club ka zawm tirh atang a awlsam dawn lo tih ka hria a, a hahthlak turzia pawh ka hre lawk.”
“Kei chuan theihtawp chhuahin ka thawh chhunzawm zel ang. Club neitu tharte an awm hnu in anni lamin engmah min nawr tut tut lova, zahawm takin an awm. Thil a danglam hma chu ka hna hi ka theihtawpin ka thawk zel dawn.” tiin a hma hun chungchang a sawi ve bawk.