Hri kai hmuh chhuah vata enkawl hma a pawimawh : ZMC


Zoram Medical College (ZMC)-a damlo na zual, Intensive Care Unit (ICU)-a enkawlte dinhmun zirchianna atanga a lan danin, sample test hma leh hri kai tih hmuhchhuah vata enkawl nghal a pawimawh thu ZMC-a damlo enkawltuten an sawi.
Dr P.C. Lalramenga, Nodal Officer, COVID Task Force, ZMC chuan, hripui vanga nunna kan chan loh an mahni inringhlelte leh symptom neite chuan a rang thei ang bera sample an test vat vat a pawimawh hle tih an sawi a. Hri kai zat atanga chhuta nunna chân an tlem hi lawmawm rualin, ICU-a serious taka lut an tlem phah loh avang leh nunna chân an pung zel bawk si avangin thil lawmawm a nih loh thu an sawi.
“Nunna chhan hi kan tum ber a ni a, a tuartute tan a nat bakah keini damlo enkawltute pawhin na kan tiin hrehawm kan ti ngawih ngawih a ni,” tiin, Dr PC Lalramenga chuan mahni inringhlel leh symptom neite chu rei rial lova anmahni veng/khua Task Force te emaw medical mi hnaivaite hriattir a, sample test-na hnai ber kiosk/damdawi in etc. pan vat turin an chah a ni.
Dr Lalnunmawii Sailo, Associate Professor, Anaesthesilogy & ICU in-charge, ZMC pawhin damlo serious tak tak admit-te zingah ‘hritlang satliah mai mai’ tia palsam tum an tam thu a sawi a. “A tirah engah vak an ngaih loh avang leh dam leh mai tura an in ngaih avangin an ngaihthah a, a lo rei deuh a, a serious tak hnuah sample an han test a, an positive tih an inhriat meuh chuan ICU a luh ngai khawpin a lo tlai hman tawh thin a ni,” a ti.
Hri kaite chu hri an kai tirh atanga serious taka awm nghal an nih ngai loh thu sawiin, “|halai hrisel te leh mi chakvak te chuan hritlang pangngai angin na vak lovin an dampui a ni thei a, hri kai zawng zawngah a ni thei lo va, a bik takin thalaiten inah hri hawnin an chhungte an kai a, anmahni chu an dam nghal pawh a ni thei a, an kaichhawn an chhungte zinga natna benvawn nei leh tar chak lote, hriselna pan te erawh chuan na takin an tuar thei a ni,” tiin Dr Lalnunmawii Sailo chuan mahni chenpuite leh bul hnaia awmte ngaih pawimawha fimkhur a tul thu a sawi.
Covid-19 kai te tan damdawi an neih that tawh avangin hri kai tih inhriat veleh a Monoclonal Antibody Cocktail (MAC) khai nghal vat a nih chuan ICU a luh ngai em em lovin a inenkawl dam theih thin thu leh an nat serious a, ICU hialte an lut tawh a nih chuan MAC khai hian awmzia a neih tawh thin loh thu a sawi bawk.
Vaccine lak pawimawhzia sawiin Dr Lalnunmawii Sailo chuan, ZMC a Covid-19 vanga nunna chan zinga zaa 16 chu vaccine full dose la an ni a, zaa 24 hi vaccine first dose la hman niin, a bak zawng zaa 60 hi vaccine la lo an nih thu a sawi a. Vaccine la tawh zinga nunna chante hi natna khirh tak chi hnih/thum lai neite leh kum 80 chunglam te an nih thu a sawi bawk.
Dr Lalnunmawii Sailo chuan, ZMC a Covid-19 positive an enkawl sa ICU a an admit aiin pawn lam atanga refer ICU a dah luh nghal ngai khawpa serious hi a let tam tak an ni tih sawi bawkin, “Refer hma leh tlai hian thui takin awmzia a nei a, chumi tur chuan in test vat a, hri kai inhriat veleha inenkawl hian nasa takin min veng dawn a ni,” a ti a ni.

Leave a Reply

Your email address will not be published. Required fields are marked *

error: Content is protected !!