Nepal leh India-a tui lianah mi 180 chuang thi tawh


Nepal leh India state pahnih – Uttarakhand leh Kerala-a tun hnaia ruah sur nasa avanga tui liana thi chu mi 180 chuang an ni ta.
Chenna in tam tak tuiin a la a, lei a min nasat avangin kawngpui ping leh tlabal tam tak a awm bawk.
Nepal bikah hian mi 88 vel an thi tawh a, Uttarakhand-ah mi 55 an thi tawh a, heng zinga panga chu chhungkaw khata mi an ni a, mi eng emaw zat chin hriat loh an la awm bawk.
India chhim lam, Kerala-a ruah nasa tak sur avanga tui liana thi pawh mi 42 an tling tawh bawk.
Nepal-a thi zingah hian chhungkaw khata mi paruk an tel a, an zinga pathum chu naupang niin an chenna in chu lei min thutin a chhilh a ni.
A tuar na ber chu khawchhak lam, Panchthar district bakah khawthlang lama Ilam leh Doti district-te an ni.
Chhanchhuah hna thawktute chuan Nepal khawthlang lam, Seti khuaa ni hnih tang tawh mi 60-te chu pawh tawhin chhanchhuah tumin an bei mek tih Reuters chuan a tar lang.
Nepal sorkar chuan thite hi $1,700 theuhva a ral tur thu a puang.
Himalaya tlangdunga awm, Uttarakhand-ah chuan sikul khar a ni a, sakhaw biakna hmun leh khualzinten an tlawh thin hmunte pawh khar lailawk a ni.
Ganges lui lian chuan Rishikesh leh khualzinten an tlawh nasat tak, Nainital a tibuai hle bawk.
Uttarakhand-ah hian October thlaah ruah mm 30.5 vel an dawng thin a, tun tumah erawh darkar 24 lek chhungin mm 328 zet an dawng thung.
Indian Meteorological Department chuan ruah sur tam zualpui erawh a tawp tawh dawn niin an sawi.
Chief Minister Pushkar Singh Dhami chuan thite hi Rs. 4,00,000 theuhva ral an nih tur thu leh chenna in chhiate pawh Rs. 1,90,000 theuhva zangnadawmna an pek tur thu a sawi.
Prime Minister Narendra Modi pawhin chhiatna thleng pawh a tih thu a sawi a. Twitter-ah, “Uttarakhand hmun thenkhata ruah sur nasa kaihhnawiha thite pawi ka ti a, hliam tuarte pawh dam chhuak leh thuai turin ka duhsak hle,” a ti.
Chhim lam tuipui kama awm, Kerala-ah pawh Zirtawpni kal ta atang khan ruah tam tak a sur bawk.
Mi sang tel hmun himah suan niin chenna in 1,600 chuang a chhia.
A hun lova ruah tam tak sur hi mi thiamte chuan sik leh sa inthlak nasa lutuk vangah an puh a, hetih rual hian chhiatna thleng tam tak erawh mihring siamchawp niin an ngai.
Uttarakhand bikah hian Himalaya tlangdunga hydro-power project lian tak tak siam te, tlang awiha lei min thei dawlna tha ngaihtuah lova in leh hmun lian tak tak din chuan chhiatna a thlentir nasa niin an ngai.
Mi thiamte hian khaw lum mek zelah Himalaya-ah vur a tlem a, ruah a sur khan vur lo daltu leh vura chang thei mai a ni loh avangin hnuai lamah tui a luang ta vak a, chu chuan a thlang lamah tui a tilian niin an sawi.

Leave a Reply

Your email address will not be published. Required fields are marked *

error: Content is protected !!