India chuan January thlaa Covid-19 laka invenna damdawi a pek tan atangin dose tluklehdingawn a pe tling ta.
Dose tluklehdingawn pe tling tur hian ni 278 a mamawh a, January 16 atang khan bul a tan a ni.
Invenna la thei chin, kum 18 chung lam zinga 30% (mi maktaduai 291) chuan a bikimin an la tawh a, mi maktaduai 707 erawh dose khatna chauh la an la ni.
India hian kumin kum tawpah hian a ram chhunga invenna la thei chin zawng zawng, mi tluklehdingawn chuang hnenah invenna pek hman vek a tum a; mahse, a tum hlen tur chuan tun aia chaka a pek a ngai dawn niin mi thiamte chuan an sawi.
India hi China dawta invenna damdawi dose tluklehdingawn pe tling leh hmasa ber niin China hian June thla khan a lo tlin tawh.
Ni 278 chhunga dose tluklehdingawn pe tling tur hian India-ah hian ni tin dose maktaduai 3.6 pek ziah ang a ni a. Hetih rual hian ni khata pek zat hi a danglam nasa hle a, a chang chuan dose maktaduai pek tlin loh chang pawh a awm thin.
India-in vaccine dose tluklehdingawn a pek tlin hi lawm a tum a, Health Minister Mansukh Mandaviya chuan a lawm man Delhi-a red Fort-ah film leh hla a tlangzarh ang.
India-ah hian Covid-19 kai hi mi maktaduai 34 chuang awm tawhin United States dawta kai an tamna ber a ni a. Mi 4,52,000 chuangin thihpui tawhin US leh Brazil dawta thi an tamna ber ram a ni bawk.
India-ah hian vaccine pathum – Oxford-AstraZeneca siam, tual chhunga Covishield tia hriat; Indian firm Bharat Biotech-in an siam, Covaxin leh Russia-in a siam, Sputnik V te a hmang.
Naupang kum 18 tling lote hnena pek tur pawh hman turin a pawm tawh bawk.
Sorkar chuan Indian pharma company Cipla chu Moderna siam vaccine lak luh phalna a pe tawh bawk a, he damdawi hi 95% dawna Covid-19 veng thei a ni a; mahse, lak luh tur zat erawh hriat a ni lo.
Vaccine dang siam mek, sorkarin a pawmpui tura enchhin mek a awm nual bawk.
India-ah hian invenna lak hi mahni duhthu a ni a, hmun 60,000 chuangah pek niin sorkar enkawl hmuna lakin a thlawn a ni a, mi mala lak erawh chuan pawisa chawi a ngai ve thung.
Sorkar hian a thlawna mipuia pe tur hian $ tluklehdingawn nga vel a seng a ni.
Mi thiamte chuan India-a puitling chin zawngte kumin chhunga invenna pe hman vek tur chuan ni khatah dose maktaduai 12 chuang pek a ngai niin an sawi.
Health economist Dr Rijo M John chuan kum 45 chung lam, hri kai mai hlauhthawnawm zinga maktaduai 70 chuang chuan dose hnih lak turah dose khat chauh an la la niin a sawi.
September 17 khan Prime Minister Narendra Modi-a piancham kum 71-na pualin ni khatah dose maktaduai 20 chuang zet pek a ni.
October thla khan ni khatah dose maktaduai 5.3 zel pe ang a ni a. September 19 leh October 18 inkar khan pungin dose maktaduai ruk vel zel pe ang a ni.
India-ah hian kum 18 chin tan mi maktaduai 960 tana invenna a pek tan khan a kalpui muang hle a. Hei hi a damdawi indaih loh leh a damdawi hlauh vang a ni ber a; mahse, Covid-19 thawh hnihnain a nuai atang khan chak lehzualin a pe tan a ni.
India-ah hian mi maktaduai 900 vel invenna bikima lak hmabak an la awm a, a tum tihlawhtlinga pe kim vek turin thla hnih leh a chanve pawh hun a nei tawh lo.
Bul tan lamah muang mah se India hian nasa taka beiin mi mal leh sorkar damdawi in 61,000 chuangah invenna hi a pe mek.