Nimin khan Congress party-in Kawnpui Convoy Ground-ah Tuirial A/C bye-election neih tur atan campaign beihpui an thlak a. He hunah hian Congress party candidate Chalrosanga Ralte (Mavala) chuan thu sawiin, politics chu dawta khelh mai mai chi a nih loh thu a sawi.
“Politics hi vawiinah chuan kan khelh dan a dang tawh a, mipuiin social media kaltlangin engkim a thlen rual rualin an hre vek a. Politics hi dawta khelh mai mai chi a ni tawh lo, kei chuan politics hi rinawmna leh dikna nena khelh tur a ni, in tan hian rinawm takin ka ding dawn a ni,” Mavala hian a ti.
Rawngbawl nana politics chu khel a nih avangin Tuirial bial mipui tan a inpum pek tur thu Chalrosanga chuan a sawi a. Politics hi eizawnna chi a nih loh thu leh, mipui rawngbawlna a ni tih hi a hriat chian avangin thlan tlin a nih chuan Tuirial bial mipuite tan hian a inpumpek tur thu a sawi.
Amah fiah tura mipui sawmin, Chalrosanga Ralte chuan, “Min fiah turin Tuirial bial mipuite ka sawm che u a. Thil tha ti turin incho tawn ila, inelna thaa inel turin Tuirial mipuite i intiphur tawn ang u, chutiang ti thei tur chuan in vote hlu tak hmanga min fiah turin ka sawm che u a ni,” tiin, Tuirial bial MLA ni thin, Andrew H. Thangliana hmalakna tha tak tak a hmuh thu leh a hnathawhte a hriat belh zel thu te, a hna thawhte chu bial thlan thlin a nih chuan a chhunzawm zel tur thu a sawi bawk.
Congress party President Lal Thanhawla pawhin thu sawiin, politics tui nu hi an party chuan an hriat ve ngai loh thu leh tawngkam thiam apiang inbumna a ni tih an hriat ve loh thu bakah, an hotute’n an tiam chu mipui hmanga an tihhlawhtli thin thu sawiin, “NLUP kan tih khan mi khawsa theite a zawng lo a, a zawnate chu Lal Isuan mi te ber a tih kha a zawn chu a ni. Chuvangin a hlawhtling hle a ni. Kan policy leh programme hi tih theih loh kan tiam tur a ni lo,” a ti.
SEDP chungchang sawiin Chief Minister hlui chuan, “Chhungkaw tinin NLUP dawng tawhte pawhin cheng nuai thum in dawng vek dawn a ni kan hotupa khan a ti a, kum thum dawn a ni tawha kan la dawng lo,” a ti bawk.
“Traffic jam awm lohna Aizawl khawpui ni turin kawng chhawng kan siam dawn a tihte kha kan nghakhlel em em a ni. Central sorkar BJP hi chanchin tha hril kawnga a kalh zawnga khawsa an ni hlauh hi a pawi ka ti, NEDA kaltlangin kan sorkar hi khitiang zingah khian an tel ve a ni,” tiin MNF sorkarin sorkar laipuia BJP a zawm thu a sawi a ni.