Tuirial A/C bye-election lo awm turah campaign neiin MNF Adviser Robert Romawia Royte chuan Rasdali khua a tlawhin, khawtlang hruaitute ten mamawh hrang hrang an lo thlen.
Nimina Rasdali khua a tlawhnaah Robert Romawia Royte hian MLA candidate zingah Rasdali khua leh mipuite tan a that MNF candidate K Laldawngliana chu a that ber dawn avangin an khawngaih vote pe turin a sawm a. Rasdali khawtlangin an mamawh hrang hrang an thlente chu Model Code of Conduct khapna zawh hunah sorkarin a ngaihtuah a tum tur thu a sawi.
Nimin zing vek khan Sports Minister ni bawk Robert Romawia Royte hian, Kawnpui Zone Football Association leh Kawnpui Astroturf Football Field Demand Committee-te huaihawtin Kawnpui Football Field No.2 a tlawh a. Zone Football Association kaihhruainaa meeting-ah hian Lalrinsanga Ralte MLA chuan Kawnpuiah phul lem field siamna tura engkim tihfel a nih avangin a lawmpui thu a sawi bawk.
He hunah hian K Laldawngliana pawhin thu sawiin, “MLA-a thlantlin a nih chuan phul lem field thar lawm nan MLA Cup ropui taka buatsaih a ni ang,” a ti.
October 19 zan khan Tuirial biala MNF official candidate K Laldawngliana chua Kawnpui Chhim venga mi thar lawm luhnaah thu sawiin, “Tun tum Tuirial bial bye election-a thlantlin ka lo nih hlauh chuan, bial mipuiten min thlantlin chhan ang ngeia hnathawk turin ka theihtawp ka chhuah dawn a; thil sawi mai mai chi ka ni lo a, ka sawi tawh chu tihhlawhtlin ngei ka tum thin a ni,” a ti a ni.