Nimin khan Congress party chuan Thingdawla an party campaign office-a hun an hmanah an party hruaitu pawimawhte leh INC official candidate Chalrosanga Ralte (Mavala)-ten thu an sawi.
He huna thusawitu, Lal Thanzara, Ex Minister, MPCC Gen. Secretary chuan rorel lai MNF-te hi India ram Hindu lal rama siam tumtu, BJP thawhpuitu an nih thu a sawi a. “INC hi eng nge an nih bik inti mai thei e. Indian National Congress Party hi Kristian pachal din a nih angin, vawiin thlengin chak takin Pathian hruainain a kal reng a. India ram hmasawnna tam tak thlentu pawh he INC hi a ni,” a ti.
Lal Thanzara hian Congress party chu Lengpui Airport neih theihna atan te, Tuirial Hydel Project tungding turte, MNF party sawpchhiat vek tawh Referral Hospital din thar leh a, doctor (MBBS) zir theihna tur medical college tha tak te din tura Pathian a ruat chu Congress party an nih thu a sawi.
He hunah hian PC Lalthanliana, Ex Minister, Gen. Secy pawhin thu sawiin, “Congress Party khan Finance Minister fel tak, Lalsawta kan nei a, Mizoram sum leh pai dinhmun a siamtha tih kan hria. Sorkar hnathawkte pawhin GP Fund chungchangah pawh buaina leh harsatna an nei ngai lo tih a hretu vek kan ni. Chuvangin, sorkar hnathawkte tan pawh Congress sorkar a tha ber,” a ti bawk.
Chalrosanga Ralte, INC official candidate pawhin thu sawiin, “Thil hi ka intiam ve vak vak ngai lo. Kan tih theih tur chinah chuan kan ti ang ka ti mai a, kan theih loh tur thilah chuan kan intiam ve ngai lo tih min hriatsak hram turin ka ngen duh che u a ni. Politics hi mahni eizawnna atana ngaitu chu a hlawhchham nghal. Kei leh ka chhungte hi chuan eizawnna atan kan hmang ve dawn lova, politics hi bial mipuite tana malsawmna ni turin kan hmang dawn a ni,” a ti a ni.