Inthlanah thuneitute thuneihna hre thar lehzual ang u
Tuirial bial bye-election neih hun a hnai telh telh a, political party tinte pawhin theihtawp chhuahin hma an la chho mek. An bei ngawrhin, inepna boruak pawh a na chho hle niin a hriat a, Election Department-in dan kengkawh tura a tih, Flying Squad Team te pawhin dan phal loha thil ti man an nei nual tawh bawk.
MLA inthlan a ni emaw, bye-election a ni emaw, MP inthlan; VC/LC inthlan thleng pawhin a ni ang, kan tan zawngte tana tha leh zung kan sen nasat kawngah leh kan campaign danah dan pela chet kan uar chhoin, tunlai tawng takin kan ‘over’ chho ve ta viau mai a, a thatna lai tam tak awm mah se, candidate leh party hotute lam luhaina kan thlen nasa hle tawh thin.
A mipui lam atang chuan hotu sang lamte thil tih dik loh hmasakah puh a lo ni leh thin bawk nen, kan kalphung hi her rem ngai tam tak chu a la awm chiang a ni. Mi tih ang zawng zawng hi kan tan tih a rem ve lohna chin hi a la awm a, mi kalphung anga kan kal ve nghal a tul lohna tam tak a la awm bawk. Kan politics inher dan hi ngun taka ngaihtuah that leh deuh chu a la ngai khawp mai.
Inthlan hrim hrimah pawh Election department thu zia leh thuneihzia kan hre tawk lo hle a a la lang fo maite hi inzir kan ngai nasa hle. Tuirial biala Flying Squad Team te hmalakna leh hnathawh atang hian kan duh dan dana tal ve ngawt thei kan nih lohzia zir thar leh ila, inthlan kan la hmachhawn chhoh zel turah pawh a bilha tho lo zawng ni lo, insiamrem chung leh hnamdang ze tha lo la chhawng lo zawnga campaign kan thiam leh deuh deuh chu a ngai awm e. Chuti a nih loh chuan rah duhawm lo zawk kan hre fo ang tih a hlauhawm hle.
Tuirial bial hi inzir nan hmang ila, political party tinte pawhin an tling emaw tling lo emaw, khulai bial atang khuan hmasawn kan ngaihna zirchhuak mawlh teh se.