Tun hnaia inthahna vawi tam a thlenna, Jammu & Kashmir chu Union Home minister Amit Shah-an ni thum chhung a chamchilh dawn a, Inrinni hian Srinagar a thleng ang.
A cham chhung hian Shah chuan venhimna lam sawihona a kaihhruai dawn a, khawtlang roreltu, panchayat member te bakah political worker te pawh a kawm ang.
Tun thla chhung ringawt hian Kashmir-ah hian civil mi 11 thah an ni tawh a ni.
Tun tum hi August, 2019-a sorkar laipuiin ram danpui hmanga a hung bikna, Article 370 a hlihsak hnua Shah-an Kashmir a tlawh hmasak ber tur a ni.
Civil mi, state pawn lam atanga lut mi panga telin, thahna a tam lai takin a tlawh tawh a. State pawn lam mite tawrhna avang hian mi tam takin Kashmir Valley chhuahsanin an khaw lamah an haw phah nghe nghe.
Kashmir-a BJP hruaitu, Sunil Sharma chuan Shah hi Inrinniah Srinagar thlengin Jammu pawh a tlawh dawn tih a sawi a. “A let?leh hmain Kashmir hi a tlawh leh bawk ang,” a ti.
Shah-an a tlawh tur chungchangah BJP thutkhawm zawhah Jammu-ah hian district president-te ko khawmin hun an hmanpui dawn tih a sawi bawk.
Home minister-in a tlawh dawn avang hian Kashmir Valley pumah venhimna khauh taka kalpui tan nghal a ni a, a bikin Srinagar-ah a khauh zual.
Police chuan tun hnaia tharum thawhna thleng an umzui zelnaah inkahna tum 10 thlengah mi firfiak 17 an that tawh tih an sawi a. Nilaini khan valley-a beihpui thlaknaah sipai pakhat a thi ve bawk.
Shah-an Kashmir a tlawh tur hi sorkar laipui mit atang chuan Article 370 hlih hnua an dinhmun leh mipui sukthlek thlir paha hung bikna hlih duh lohna kal zel thlithlaina a ni.
BJP-in a vawi hnih nana ram inthlanpuia hnehna an chan hnu lawk, June, 2019 khan a tlawh tawh a, a hnu lawkah Article 370 hi hlipin union territory pahnihah then zui a ni a, an dinhmun a thlithlai ngeia ngaih a ni.
Union minister – Narendra Singh Tomar, G Kishan Reddy leh John Barla te pawhin an lo tlawh tawh a, anni pawh hi mipui rilru sukthlek leh sorkarin UT-a a dah let hnua hma a lakna an ngaihdan hriat tum an ni.
Shah hian thla hmasa khan Lieutenant governor Manoj Sinha leh venhimna lam hotute pawh kawmin sorkar hmalakna kalpui dan a sawipui.