Tuirial bial inthlan lo awm tura ZPM party candidate Laltlanmawia’n “Ka tling emaw tling lo emaw agricultural link road laih kan chhunzawm ang” a ti.
Laltlanmawia chuan Tuirial biala cheng tam zawk chu kuthnathawk an nih avangin, thlan tlin a nih chuan kuthnathawktute a ngaihpawimawh tur thu a sawi niin ZPM thalai thuchhuahin a tarlang a. Feh kawng (link road) leh lui dunga inkalpawhnate, tui dahkhâwlna (reservoir) lian tham siamte a ngaihpawimawh tur thu a sawi niin an tarlang bawk.
Tuirial bial chhunga lui luangte chu chhawr thiam chuan kuthnathawktute thlai thar leh sum lâkluhna nasa taka tipungtu a nih theih thu Laltlanmawia chuan a sawi a. Chutiang tur chuan Tuirial bial chhunga khaw hrang hrangin awlsam zawka lui an pawh theihna tur kawng siam a tul thu sawiin, khaw hrang hrangin an bial chhunga lui luang – Tuirial, Serlui, tuichhuahen, tlawng, Chem lui leh Tialpui-te awlsam zawka an pawhna tur kawng laih a nih tur thu a sawi niin ZPM thalai thuchhuah chuan a tarlang.
Laltlanmawia chuan politics-a a luh hma a\ang tawhin, agricultural link road laih chu a ngaihpawimawh avangin Tuirial bialah hma a lo la nual tawh niin ZPM thalai thuchhuah chuan a tarlang a. Inthlan hmaa bial chhung hmun hrang hranga agricultural link road a lo laih mekte pawh inthlan boruakin a phuar avangin a lai chhunzawm thei lo nia sawiin, a tling emaw tling lo emaw a laih chhunzawm thuai tur thu a sawi niin an tarlang bawk.