Mipa naupang pathum, mobile phone-a mipat hmeichhiat hmanna movie (porn movie) en nsa tak pathumte chu hmeichhe naupang kum ruk mi, mipat hmeichhiatna hmanpui an tuma a duh loh avangin an that tia puhin Assam-a Nagaon district-ah man an ni.
Naupangte hi kum riat leh 11 inkar niin Nilaini khan police-in an la a, an zinga pakhat pa chu finfiahna tichhiaa puhin man a ni bawk.
Hmeichhe naupang ruang hi lung lakna hmun hluihlawn tawha inthiarnaah a lu leh a awma hliam nei chungin Thawhtannia an chenna in atanga a bo hnuah hmuh a ni.
Police chuan thil bil tak eng emaw taka hliam niin an ngai a. Post-mortem report ngaihchan mek a ni a, pawngsual chu ni chiah lovin an hria a; mahse, sawisak leh mipat hmeichhiatna lama tihluih tum chu ni ngeiin an ngai.
“Lung laknaa vengtu awm chuan ruang hi naupang pathumin an hmu niin a sawi a, pakhat chu a fapa a ni a. Guard hian ruang hi a la sawn niin naupangte hian an sawi bawk a. Thu kan zawhnaah guard hian naupang pathumte thah niin a sawi leh a ni,” tiin subdivisional police officer Mrinmoy Das chuan a sawi.
Police chuan guard fapa leh a unau fa, kum 11 mi ve ve leh kum riat mite hi hmeichhe naupangte in bul maiah hian an cheng a. Hmeichhia hian nu nei tawh lovin a pi leh ni tin inhlawh thin a pa nen an cheng.
Guard hian a fapa online class lak nan smartphone a lei a, a thiante pahnih nen porn movie en an ching zui ta a, an phone-a an lo khawih tawh (browsing history) atang pawhin a lang.
“Thawhtanni khan hmeichhia hi lung laknaah hian an hruai a, khawih an tum a. A duh lo chu an sawisa a, lungin an chhu a, a ruang chu inthiarnaah hian an dah ta a ni,” tiin Das chuan a sawi.
Police chuan mipa naupangte hi an lan danah an lianin an kum aiin an puitling a, tun hma pawhin hetiang lama hmeichhia khawih hi an ching tawh niin an sawi.